GMN TV Politika PR Lú Olo promulga ona OJE 2019, PPN Arão Noe: Bele normaliza funsionamentu Estadu

PR Lú Olo promulga ona OJE 2019, PPN Arão Noe: Bele normaliza funsionamentu Estadu

0 views

Prezidente Repúblika (PR), Francisco Guterres Lú Olo, Kinta (7/2/19), promulga ona Lei No. 5/V-Orsamentu Jerál Estadu (OJE) 2019. Maski nune’e, Prezidente Repúblika iha nia rezerva rasik relasiona ho promulgasaun lei OJE ne’e. Ho promulgasaun OJE husi PR ne’e, Prezidente Parlamentu Nasionál, Arão Noe, konsidera bele normaliza fali funsionamentu Estadu.

Tuir komunikadu ba imprensa husi media Palasiu Prezidensial haktuir,  Prezidente Repúblika sei hato’o nia análiza profunda ba Lei Orsamentu Jerál Estadu 2019, relasiona ho análiza vizaun médiu no longu prazu no situasaun oi-oin  iha loron hirak tuir mai.

Iha 23 janeiru 2019 Prezidente Repúblika veta Orsamentu Jerál Estadu 2019 ho montante billiaun USD 2.1 ho razaun sustentabilidade finanseiru iha ameasa nia laran, orsamentu  la tuir konstituisaun no lei estruturante sira, desekilibriu orsamentál ne’ebé aas tebes no laiha polítika alternativa.

Parlamentu Nasionál halo reapresiasaun ba Orsamentu Jerál Estadu 2019 hafoin veto husi Prezidente Repúblika.  Iha reapresiasaun Orsamentu Jerál Estadu, Parlamentu Nasionál hasai montante millaun USD 650 ba sosa asoens partisipasaun husi kompañia ConocoPhillips no Shell tanba kontempla tiha ona iha Lei Atividade Petrolíferu ne’ebé Prezidente Repúblika promulga.  Reapresiasaun Orsamentu Jerál Estadu ho montante billiaun $ 1,482 aprovadu ho votus 40 no 25 kontra.

Prezidente Republika, Francisco Guterres Lú Olo, Kinta (07/02) promulga ona Orsamentu Jerál Estadu 2019 ho montante Billaun USD 1.4, Prezidente Parlamentu Nasional, Arão Noe, konsidera  ho promulgasaun Orsamentu Estadu ne’e esperansa bele normaliza hikas funsionamentu Estadu.

“ Ha’u simu ona dokumentu Prezidente promulga ne’e iha tuku 3 lorokraik, ami prosesa haruka kedas ba grafik Jornal da Republica para halo publikasaun espesial no ohin lorokraik ne’e sira publika kedas, tanba tuir lei aktu publikasaun nian katak lei ruma atu tama invigor maske PR promulga ona, maibe tenki publika iha Jornal Republika foin nia tama iha invigor. Governu mos komesa aban bele aktiva fali sistema ita nian ba orsamentu normal. Ha’u hein katak ho promulgasaun ne’e bele normaliza hikas funsionamentu estadu, sai husi rejime  duodésimu ba iha OJE normal nian,” dehan Arão Noe iha PN.

Prezidente Orgaun Lejislativu nee lori Parlamentu Nasional nia naran hato’o obrigadu ba Prezidente Republika nebe promulga lalais OJE maske tuir lei fo loron 30 foin bele promulga mais Prezidente Republika mos preokupa ho situasaun Estadu nian, tanba ne’e dentru semana ida PR promulga ona OJE 2019 nune Estadu fila fali ba normalidade ho rejime orsamental anual.

“Ami agradese teb-tebes no hau hein katak ho publikasaun ne’e povu hotu bele hakmatek nune dezemvolvimentu bele lao, tanba Paz laiha dezemvolvimentu mos laiha, tanba ne’e husu ba joven, artemarsial sira atu kontribui ba paz nunee dezemvolvimentu bele lao. Liu-liu Pipeline mai Timor Leste, sei Pipeline lamai Timor Leste ita nia luta seidauk finaliza,” dehan Arão Noe.

PM Taur enkontru semanál ho PR

Nune’e mos iha loron Kinta (7/2/19) dadersan, Primeiru Ministru, Taur Matan Ruak hasoru malu ho Prezidente Republika hodi informa servisu governu nian.

Perguntas jornalista sira konaba Orsamentu Jerál Estadu 2019 nian, Xefe Governu nee lakohi fó komentariu, tanba nia lakohi tau nia ibun ba Prezidente Republika.

 “Prezidenti seida’uk veta agora ita tau ba nia ibun atu veta ne’e, ita labele hanoin tau buat ne’ebe ba Prezidenti nia ibun, hau nia mensazen mak ne’e ita hein,” hateten, Taur Matan Ruak.

Orsamentu Jeral Estadu Prezidente Republika promulga nunee haruka karta promulgasaun nee ba Parlamentu Nasional iha tuku 3 lokraik, nunee Parlamentu nasional haruka kedas ba Jornal da Republika hodi publika nudar matria espesial.Nes/Eus


Banner

Foto

Notisia Ikus

PR Lú Olo preokupa instabilidade kontinua mosu iha rai-laran

December 2, 2021
Xefe Estadu Maior Jenerál FALINTIL-Forsa Defeza...

PN hahú diskute proposta OJE 2022 billiaun 1.675 iha faze jeneralidade

December 2, 2021
Parlamentu Nasionál (PN) kinta lejislatura, Kua...

PM Taur: Situasaun Tolu Implika PIB TL tun ba Negativu 8

December 2, 2021
[caption id="attachment_43754" align="aligncenter"...

OJE 2022, Governu Prevé Millaun 25 ba Subsídiu FP

December 2, 2021
Parlamentu Nasionál (PN) Kinta lejislatura, Kua...

KM Aprova Projetu Deliberasaun no Ezonerasaun ba Calisto dos Santos “Coliati”

December 2, 2021
[caption id="attachment_52724" align="aligncenter"...
1 2 3 668

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker