GMN TV Politika CNRT: Koligasaun foun legál ■Nakloke ba partidu seluk

CNRT: Koligasaun foun legál ■Nakloke ba partidu seluk

0 views

Komisaun juridisaun partidu Kongresu Nasionál Rekonstrusaun Timor-Leste (CNRT_sigla portugés), Carmelita Caetano Moniz, rejeita deklarasaun terseira Vise Prezidente Partidu Libertasaun Popular (PLP), ne’ebé hateten, koligasaun foun ne’ebé partidu neen halo dadaun ne’e  ilegál, tanba koligasaun anterior sei eziste.

Atual deputada CNRT ne’e deklara, koligasaun pre-eleitorál ne’ebé ho naran Aliansa Mudansa ba Progresu (AMP) la eziste nanis ona, tanba iha akordu koligasaun nian, artigu balun hateten ona kona-bá ezistensia AMP pre-eleitorál nian, tanba ne’e, dadaun eziste de’it mak Aliansa Maioria Parlamentár.

“Ami iha koligasaun pre-eleitoral ne’ebé mak ita bolu naran Aliansa Mudansa ba Progresu (AMP) ne’ebé kompostu husi CNRT, PLP no KHUNTO, iha ne’ebá ami iha akordu ida pre-eleitorál ne’ebé partidu tolu ne’e asina, iha akoordu ne’e, iha klauza ida, iha artigu ida hateten katak, koligasaun ida Aliansa Mudansa ba Progresu pre-eleitorál ne’e, nia hotu iha loron tolu-nulu nia laran, hafoin Primeiru Ministru foun simu pose, ho artigu ida ne’e mak fó dalan ba bankada tolu ne’e, hodi harí bankada ketak-ketak, katak bankada PLP, CNRT No KHUNTO. Se artigu ida ne’e laiha karik, ami labele harí bankada ketak-ketak, maibe harí bankada ida de’it ho naran bankada Aliansa Mudansa ba Progresu”, esplika Carmelita ba jornalista sira iha PN, Kinta (27/02/2020).

Carmelita afirma, konjuntura koligasaun foun ne’e, nakloke ba Partidu Polítiku (ParPol) sira ne’ebé mak hetan asentu iha Parlamentu Nasionál (PN), atu envolve.

“Aliansa ida agora halo iha Parlamentár ne’e, ho koligasaun ida ne’ebé inklui mós UDT/ Frente-Mudança, ne’eduni agora dadaun ne’e Aliansa Maioria Parlmentár (AMP) ne’ebé nafatin kompostu husi CNRT, PLP no KHUNTO, inklui  UDT/Frente-Mudança. Ha’u seidauk haree partidu ida katak nia sai husi koligasaun AMP, nem PLP, CNRT no KHUNTO, inklui UDT/FM. Iha konjuntura foun ida agora, ita haree husi CNRT, KHUNTO, PD, UDT, FM no PUDD. Tanba ne’e, Aliansa Maioria Parlamentár nakloke ba hotu-hotu ne’ebé mak iha vontade di’ak, la presiza denunsia, tanba ami nia Aliansa Mudansa ba Progresu ne’e hotu iha tempu loron 30 depois PM simu pose. Tanba ne’e, mak hodi loke dalan ba ami harí bankada ida-idak. Tanba ne’e, tuir ha’u nia ponto de vista, jurídikamente, koligasaun foun ne’e laiha impaktu ida”,tenik Caetano.

Antes ne’e, terseira vise prezidente PLP, Maria Angelina Sarmento, deklara, PLP konsidera, ezistensia koligasaun foun ne’ebé kompostu husi CNRT, KHUNTO, PD, UDT, Frente-mudansa no PUDD ne’e ilegál, tanba koligasaun atual, Aliansa Mudansa ba Progresu ne’ebé rejistadu iha Tribunal, sei vale hela, maibé CNRT nu’udar kadeira maioria iha koligasaun anterior, forma tan koligasaun foun. Tanba ne’e, PLP deklara, sei tetu hodi halo reklamasaun ba aktu refere.sayc


Banner

Foto

Notisia Ikus

PPN: Singapura rejeita TL adere ba ASEAN ne’e normál

August 5, 2021
Prezidenti Parlamentu Nasional (PPN) Aniceto Gut...

FRETILIN husu Governu hadi’ak implementasaun SB

August 5, 2021
Bankada FRETILIN, sujere Governu atu avalia impl...

Governu laiha kapasidade ezekuta OJE

August 5, 2021
Deputada bankada CNRT, Bendita Moniz Magno, kons...

Kevin Blackstone la kontente husik TL

August 5, 2021
Embaixadór Estadu Unidu Amérika (EUA), Kevin B...

Governu seidauk rekupera estragu sira husi DN

August 4, 2021
Parlamentu Nasionál (PN) kestiona, besik ona fu...
1 2 3 625

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker