Xefe bankada Partidu Demokrátiku (PD), António da Conceição “Kalohan” hateten, atu evita Eleisaun Antesipada (EA), PD sei haruka karta ofisiál ba partidu FRETILIN no CNRT.
Intensaun PD sei submete karta ba partidu rua refere, oinsá atu halo komunikasaun ho partidu boot rua ne’e, nune’e labele hakat ba EA.
“Haree ba sura loron ho tempu ne’ebé badak tebes, partidu sei diriji karta mais tarde to’o aban (13/2) konteúdu husi karta ne’e, partidu PD hakarak husu partidu CNRT no FRETILIN oinsá mak ita bele evita EA, hodi bele hamosu governasaun foun ida”, Xefe bankada PD ne’e ba jornalista sira iha PN, Kuarta (12-02-2020).
Kalohan esplika, PD nia hanoin la’ós lakohi EA, sé desizaun ne’e mak Xefe Estadu hola, PD lakohi EA, tanba povu kolen ona hakat ba eleisaun no tinan tolu tuir malu halo eleisaun.
“Ita la valoriza povu-nia votu, tanba ne’e, ami la prerefe ba EA, ami hakarak ko’alia formasaun governu foun. Maske Prezidente CNRT lakohi envolve ona iha governasaun foun, maibé seidauk ofisialmente, ida ne’e deklarasaun entrevista iha média fó hanoin iha entrevista, maibé seidauk iha hanoin ba Xefe Estadu sei nakloke“, haktuir Xefe bankada PD ne’e.
Enkuantu Xefe bankada Congresu Nasionál Rekonstrusaun Timor (CNRT), Duarte Nunes hateten, sé PD haruka karta ba CNRT ho FRETILIN, ne’e sira nia diretu, maibé CNRT labele interfere.
“PD haruka karta ba CNRT ho FRETILIN ne’e sira nia direitu, iha hanoin partidu sira ne’ebé iha asentu parlamentu tenke bo’ok-an, maibé tuir ida-idak nia hanoin atu kontaktu sé no ho intensaun saída ne’e, partidu la’ós bankada”, tenik Duarte.
Entretantu hafoin halo diálogu ho líder istóriku sira iha Segunda, loron 10, fulan ne’e, Prezidente Repúblika (PR), Francisco Guterres “Lú Olo” deklara katak, iha opsaun tolu atu hakotu inserteza polítika ne’e, hanesan husu partidu sira ne’ebé hetan asentu iha Parlamentu Nasionál (PN) ba kinta lejislatura, atu dezeña hanoin oinsá fó solusaun ba impasse polítiku ne’e, Primeiru Ministru (PM), Taur Matan Ruak sei mantein nafatin to’o hetan governu foun no ida seluk EA mak nu’udár rekursu ikus hodi solusiona situasaun ne’e. ety
