Xefe bankada Partidu Demokrátiku (PD), António da Conceição preokupa ho estrutura meza Parlamentu Nasionál (PN), ne’ebé la sólidu ona dezde Orsamentu Jeral Estadu tinan 2020 la pasa iha Parlamentu Nasionál.
Deputadu PD ne’e observa katak, hafoin diskusaun proposta Orsamnetu Jerál Estadu (OJE) ba tinan 2020 ne’ebé sumba iha loron 17 fulan Janeiru tinan ne’e, to’o agora, estrutura meza PN entre vise na’in rua ho Prezidente PN nia relasaun la sólidu hanesan uluk, tanba vise na’in rua la marka prezensa iha meza.
“Dezde ida diskusaun orsamentu ninian, meza ne’e tenke bem reprezentadu, labele ho aparensia ida hanesan atual ne’e, se karik deputadu sira ne’ebé mak iha altura ne’ebá sólidu iha meza ne’e, ami husu favór ida atu retoma pozisaun”,afirma Xefe bankada PD ne’e iha plenária, Segunda (10/02/2020).
Hatán preokupasaun ne’e, Prezidente PN, Arão Noe de Jesus da Costa Amaral, justifika, Vise Prezidente PN Primeiru husu lisensa no vise segundu hala’o mandatu servisu ba rai liur, hodi responde konvite husi Korea, ho fundu ne’ebé viajen apoiu husi nasaun refere.
“Vise Maria Angelina nia husu lisensa ba Soibada, ne’e duni oras ida lorokraik (horiseik lorokraik) mak fila, Vise Luis, responde konvite ida husi Korea do sul, partisipa iha reuniaun ida, ho kustu ema mak selu hotu, no oras ida meudia (horiseik meudia) foin to’o iha Timor. Ami ezerse ami-nia funsaun to’o de’it ami-nia mandatu ne’ebé mak fó, hotu kuandu iha ona konstituisaun grupu Parlamentár foun, lei rejimentu artigu 16 iha para ami bele uza ida ne’e no artigu 20 a ba meza seluk bele uza”,argumenta PPN Arão Noe.say
