Primeiru Ministru (PM), Taur Matan Ruak, entrega ona ninia karta demisaun ba Prezidente Repúblika (PR), Francisco Guterres Lú Olo, hodi fó dalan ba koligasaun foun atu forma governu da-sia.
“Ne’e enkontru ida ne’ebé Prezidente Repúblika konvoka, para ko’alia ho sua exelensia Prezidente Repúblika, ha’u hatama karta ida manifestasaun ha’u nia intensaun ba demisaun, no ohin ha’u ko’alia ho sua selensia Prezidente”, dehan Taur ba Jornalsita sira, hafoin enrega karta rezignasaun ba Xefe Estadu Tersa (25/02/2020), iha Palásiu Prezidensial Nicolau Lobato Bairo Pité Díli.
Taur haktuir, últimu palavra ba Prezidente Repúblika mak, tuir konstituisaun, pedidu demisaun ne’e válidu kuandu Prezidente Repúblika dekreta ona, maibé enkuantu seidauk, Taur Matan Ruak sei kontinua nafatin assume kna’ar hanesan Primeiru Ministru, para garante atividade governativa iha rai laran.
Taur Matan Ruak haktuir, kuandu Prezidente Repúblika la aseita ho nia rezignasaun ne’e, Xefe Governu ne’e prontu atu hala’o nafatin servisu governu nian.
“Ita mós labele husik ita-nia nasaun, hanesan kareta ida karik kondutor la iha, ha’u hanoin ita bo’ot sira rona koligasaun foun ne’e, ha’u hanoin to’o tempu ha’u esplika ba populasaun, mas agora buat ne’ebé ha’u bele hatete ba ita bo’ot sira, pedidu demisaun ne’e so válidu, kuandu Prezidente Repúblika dekreta, enkuantu seidauk dekreta, ha’u kontinua Primeiru Ministru”, tenik Taur.oly
