GMN TV Capital PM Taur: Halakon rezolusaun, aplika lei ba GAM

PM Taur: Halakon rezolusaun, aplika lei ba GAM

0 views

Primeiru Ministru (PM), Taur Matan Ruak, aprezenta rezolusaun ne’ebé Konsellu Ministru aprova ona iha loron Kuarta (19/02), hodi reativa Grupu Arte Marsiál (GAM), ba Prezidente Repúblika (PR), Francisco Guterres Lú Olo.

VIII Governu ne’e, halo ona revogasaun ba rezolusaun governu númeru 16/2013, hodi bandu grupu artemarsial sira hanesan PSHT, KORK no IKS atu labele halo atividade.

“Ne’e enkontru semanal,  ko’alia asuntu ida deit, informa ba Prezidente Repúblika, kona-bá revogasaun rezolusaun 2013 nian,  husu para aplika númeru 5/2017, 19 de Abril kona-bá arte marsiais”, informa Taur Matan Ruak ba Jornalista sira Kinta (20/02/2020), iha Palásiu Prezidensial Bairo Pité, Díli.

Taur esplika, rezolusaun ne’e la bo’ot liu lei,  tanba lei ne’e  promulga husi Prezidente, tanba saida mak la aplika lei no aplika mak rezolusaun, tanba ne’e  halakon rezolusaun ne’e.

PN: GAM presiza kontribui reseita ba Estadu

Parlamentu Nasionál (PN) apoia inisiativa Governu hodi reativa hikas atividade Grupu Arte Marsiál (GAM), maibé husu Governu atu dezenvolve GAM tolu hanesan, PSHT, KORK no Kera-Sakti, liu husi polítika nasionál desportu, atu bele kontribui reseita ba Estadu, liu husi kompetisaun nível internasionál.

“Buat ne’ebé Governu halo ne’e loos, tanba ne’e rezolusaun Governu nian, bainhira Governu konsidera laiha ona nesesidade atu mantein sira bele muda, tanba rezolusaun ne’e mós mai tiha lei nú 5/2017, kona-bá armas  brankas hodi regula atividades GAM nian. Ne’e hatudu katak, rezolusaun ne’e vale hela, maibé lei ida mai ne’e mak bo’ot liu fali, entaun agora lei mak prevalese. Hanesan MRLAP ko’alia katak, lei ne’e mak prevalese, no polísia ka’er de’it lei ne’e, tanba rezolusaun ne’e hanesan proive de’it GAM tolu ne’e (PSHT, KORK no Kera Sakti), tanba ne’e mak sira livre ona, maibé tenke kumpri nafatin lei armas brankas ne’e, tanba ne’e iha lei ne’e mós hateten, tenke ba rejista tiha, kumpri kondisoens ne’ebé lei ne’e haruka, para depois Estadu bele fó apoiu, em termu iha kompetisaun sira ne’e, para bele kompete ba nível internasionál, hanesan GAM sira seluk, importante agora mak sira tenke rejista iha KRAM, depois KRAM mak sei regula, rejistu tiha atividade ne’e la’o normal ona hanesan sira seluk, tanba importante ba ita mak, ita presiza kontrola, tanba sira (GAM tolu) ne’e mós hanesan Timor-oan. Tanba ne’e sira mós iha direitu atu hala’o sira-nia atividade, hanesan Timor-oan labele viola lei, labele mosu para halo problemas, ne’e ema hotu la gosta, entaun ita mós lakohi ida ne’e, tanba ne’e espera iha tempu badak sira bele halo sira-nia atividade, maibé tenke koordena ho KRAM, tanba KRAM mak fó orientasaun, ajuda sira (GAM) bainhira halo atividade hanesan aprova estatutu karik,  ne’e hamutuk ho parte seguransa nian, para atividade hotu bele la’o ho di’ak. Ne’ebé ho intensaun atu ba rejista, tanba sira (GAM) tenke priense kriterius, antes ba rejista ne’e”, hateten xefe bankada CNRT, Duarte Nunes ba jornalista sira, iha PN, Kinta (20/02/2020)

deputadu CNRT ne’e afirma, kona-bá polítika Governu nia hodi re-ativa derepente, membru PN ne’e hateten, nu’udar lejisladór konsidera inisiativa refere di’ak, tanba iha lei atu regula.

“Aprova derepente ne’e ho intensaun saída lahatene, maibé ami haree hanesan  lejisladór katak, lei ne’e regula ona, tanba momentu ne’ebá sira (GAM) ladun iha atividades, tanba limite hela ho rezolusaun ne’e, entaun kesi hela sira, depois sira la halo atividades hodi kumpri rekezitus ne’e, maibé ho ida ne’e, fasilita sira, para sira bele halo atividades, bele halibur sira-nia ema, desde iha autorizasaun husi polísia no kumpri regulamentu ne’e laiha problema ona. Ne’e iha direitu ho organizasoens sira seluk hanesan, sira bele halo atividades hodi kumpri rekezitus ne’e, depois formaliza tiha iha KRAM, rejistu ne’e mak importante, nune’e Estadu bele tau matan no kontrola, karik sira presiza buat ruma, Estadu bele fasilita, bainhira tuir regulamentu”, tenik Nunes.

Iha sorin seluk, deputadu bankada FRETILIN, Joaquim dos Santos mós reforsa, bankada FRETILIN hala’o hela estudu ida, hodi prepara esbosu lei kona-bá arte marsiais, atu bele diskute no aprova iha PN, nune’e bele dezenvolve no regula di’ak liu atividades arte marsial nian.

“Kuandu ami aprezenta ami nia projetu lei kona-bá  arte marsiais nian, sei diskute kona-bá buat arte marsiais nian, ne’e mak kuandu aprova ona, ne’e resoluzaun ho dekretu sira ne’ebé ko’alia kona-bá arte marsiais, ne’e tenke revoga hotu, tanba kontestu hotu-hotu ne’ebé liga ba arte marsiais, ita sei define hotu iha lei ne’e, maibé ida ne’e la’os aban ka bainrua, tanba sei iha prosesu preparasaun no elaborasaun lei nian, ita prepara hela ekipa ida atu halo servisu ba ida ne’e, para atu aprezenta ba PN. Sei halo estudu hela, tanba seidauk bele fó possibilidade ruma lai, tanba grupu deputadu balun ho tékniku sira sei prepara hela esbosu ba ida lei ida ne’e”,informa deputadu FRETILIN ne’e.

Lejisladór ne’e mós apoia tebes inisiativa Governu nian, tanba bele fó oportunidade ni respeita sidadaun nia direitu.

“Konsellu Ministru aprova rezolusaun ida hodi revoga rezolusaun anterior ne’e di’ak liutan, tanba ne’e sinál ida katak, ita hahú respeita ona direitu fundamental sidadaun nian ne’ebé garantia iha konstituisaun, tanba Governu fó ona marjen no oportunidade ba órgaun seguransa no judisiáriu sira para hala’o sira-nia knár tuir lei haruka, organizasaun arte marsiais ne’e halo parte iha polítika desportu nasionál nian, tanba ne’e Governu tenke iha polítika ida para dezenvolve polítika ida ne’e, nune’e bele ajuda mós setór turizmu, para bele fó reseitas ba Estadu, tanba ne’e di’ak, arte marsiais sira atu oportunidade atu konsolida sira-nia aan, tuir lei ne’ebé haruka, ita-nia nasaun ne’e Estadu direitu demokrátiku, sidadaun hotu-hotu bele ezerse nia direitu tuir konstituisaun garante, maibé importante mak tenke tuir lei haruka, bainhira lei bandu hahalok balun, ita labele halo, lei proteze ita-nia hahalok sira ne’ebé la viola konstituisaun, ne’e mós halo obrigasaun ba ita-nia Governu para halo polítika ida ne’ebé produz ho efetivu, liu-liu iha sosiedade juvenil, atu juventude sira partisipa iha dezenvolvimentu, liu husi polítika desportivu nian, tanba desportu ne’e mós hola parte iha área turizmu nian, nune’e bele hatama ona reseitas ba Estadu”, Joaquim akresenta.

Iha Kuarta ne’e, governu da-ualu, liu husi konsellu ministru, aprova ona rezolusaun ida, hodi re-ativa hikas Grupu arte marsial tolu, hanesan KORK, Kera-Sakti no PSHT ne’ebé antes ne’e governu bandu atu hala’o ni atividade grupu nian.oly/say


Banner

Foto

Notisia Ikus

PR Lú Olo preokupa instabilidade kontinua mosu iha rai-laran

December 2, 2021
Xefe Estadu Maior Jenerál FALINTIL-Forsa Defeza...

PN hahú diskute proposta OJE 2022 billiaun 1.675 iha faze jeneralidade

December 2, 2021
Parlamentu Nasionál (PN) kinta lejislatura, Kua...

PM Taur: Situasaun Tolu Implika PIB TL tun ba Negativu 8

December 2, 2021
[caption id="attachment_43754" align="aligncenter"...

OJE 2022, Governu Prevé Millaun 25 ba Subsídiu FP

December 2, 2021
Parlamentu Nasionál (PN) Kinta lejislatura, Kua...

KM Aprova Projetu Deliberasaun no Ezonerasaun ba Calisto dos Santos “Coliati”

December 2, 2021
[caption id="attachment_52724" align="aligncenter"...
1 2 3 668

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker