Primeiru Ministru (PM), Taur Matan Ruak, preokupadu ho estrutura Rejiaun Administrativa Espesial Oe-cesse Ambeno (RAEOA), ne’ebé seidauk estabelese, tanba Prezidente Autoriedade RAEOA, José Luis Guterres, to’o agora seidauk lori proposta ruma ba Xefe Governu.
“Prezidente Autoriedade RAEOA José Luis Guterres nomeiadu ona, tanba progama ne’e nia mak halao, se populasaun selavanta servisu autoriedade nian, normalmente senhor Prezidente Autoriedade nia mak sei esplika, ha’u la bele esplika” katak Taur Matan Ruak ba Jornalista sira Kinta (06/02/2020) bainhira remata enkontru ho Xefe Estadu Francisco Guterres Lú Olo, iha Palásiu Prezidensial Bairo Pite, Díli.
Tanba ne’e, PM Taur husu ba Prezidente Autoridade RAEOA foun atu esforsu aan hodi estabelese estrutura foun RAEOA nian atu bele hala’o servisu.
“Tanba normalmente ba estrutura ne’e tenke aprezenta ba iha Konselhu Ministru, proposta mai husi ne’eba, mas desizaun ne’e iha konselhu ministru, enkuantu seidauk mai desizaun ne’e seidauk iha”,subliña Taur.
Atual Prezidente Autoriedade RAEOA, José Luis Guterres simu pose husi Primeiru Ministru, Taur Matan Ruak, iha loron 13 fulan Novembru tinan 2019, maske fulan tolu ona, maibé to’o agora seidauk iha estrutura kompletu.
Prezidente Autoriedade RAEOA, José Luis Guterres, antes ne’e hatete, krítika sira ne’ebé ema lansa ne’e diak teb-tebes atu lori rai ne’e ba oin. Tuir LuGu, estrutura RAEOA seidauk estabele ne’e tanba hein resposta husi líder partidu polítiku sira.oly
