Maske Orsamentu Jeral Estadu (OJE) tinan 2020, antes ne’e xumba ona iha Parlamentu Nasional (PN), maibé deputadu sira kontinua halo fiskalizasaun ba projetu sira.
Deputadu bankada Partido Democrático (PD), Adriano do Nascimento hateten, PN kontinua halo fiskalizasaun, tanba konstrusaun estrada no ponte sira ne’e atu finaliza ho durasaun tempu naruk no projetu balun multi anual.
“Fiskalizasaun kontinua la’o, tanba konstrusaun estrada no ponte sira ne’e ohin ita hala’o la’ós finaliza kedas, só Xineza sira mak konstroe uma semana ida finaliza ona, maibé projetu balun multi annual. Ami sei simu salaríu, ami tuur halimar de’it, maske OJE la pasa ne’e sim, maibé iha dotasaun orsamentu temporáriu hodi ajuda mákina Estadu funsiona, ami toba de’it iha uma mós la lózika ida, ami tenke halo fiskalizasaun projetu ne’ebé maka kompañia sira hala’o hela servisu“, reprezentante povu ne’e ba jornalista sira iha PN, Sesta (30-01-2020).
Nia subliña mós katak, kna’ar deputadu sira ni’an mak halo fiskalizasuan, halo desizaun politíka no halo lei, ho nune’e projetu sei la’o hela, deputadu sira mós tenke tau matan sé la’e projetu laiha kualidade.
Proposta OJE 2020, ne’ebé Xefe Governu, Taur Matan Ruak aprezenta iha Parlamentu Nasionál (PN), iha faze jeneralidade durante loron tolu (3), hahú husi loron 15 to’o loron 17, fulan Janeiru ne’e.
Maibé OJE ho montante billiaun USD1.668 ne’e tenke sumba iha PN, ho votus, kontra 15, afavór 13 no abstensaun 25 maioria husi deputadu bankada CNRT. Ety
