Prezidente Repúblika (PR), Francisco Guterres Lú Olo, bolu atensaun ba partidu hirak ne’ebé halo ona koligasaun hodi forma IX Governu, liu-liu Partidu CNRT atu tetu ka hanoin didiak kuadru sira ne’ebé atu envolve iha governu da-sia ne’e, antes haruka lista governu foun ba Xefe Estadu. Basá antes ne’e PR rejeita ona kandidatu membru Governu balu ne’ebé tuir nia iha hela kazu iha Tribunal.
Maske nune’e, Xefe Estadu hatete, to’o agora nia seidauk simu karta ofisial ruma kona-ba koligasaun foun ne’ebé lídera husi partidu CNRT ba formasaun governu foun.
“Atu aprezenta fila-fali lista ema nain 9 ninian, CNRT no partidu sira seluk hanoin halo didiak, hanoin halo didiak, ha’u repete tan hanoin halo didiak mak aprezenta lista”, salienta Lú Olo ba Jornalista sira segunda (24/02/2020), iha Salaun Ministériu Finansa Aitarak Laran, Díli.
Lú Olo akresenta, ema hotu hatene ona katak, Prezidente Repúblika la fó pose ba membru governu na’in sia ne’ebé nomeia husi governu da-ualu, hodi ikus mai tanba deit ema nain 9 ne’e vota kontra orsamentu jeral Estadu tinan 2020, orsamentu ida ba povu tomak, tanba deit ema nain 9 ne’e mós halo Governu, Primeriu Ministru hanesan ne’e hela.
“To’o agora ha’u seidauk simu karta ruma husi koligasaun foun ne’ebé dehan katak forma ona entre partidu polítiku sira, partidu polítiku sira mak buka malu la esklui neen partidu ida, hotu-hotu ba buka malu ho ulun fatuk malirin mak ko’alia, depois aprezenta fali ba Prezidente da Repúblika, maibé to’o agora ha’u seidauk simu. dehan Lú Olo.
Xefi Estadu mós realsa, Prezidente Repúblika hatete dala barak ona katak, governu mantein nafatin, no señor Primeiru Ministru mós mantein.
“Ne’e ha’u hatete formasaun governu ne’e, governu ida kuandu la iha tiha ona, maibé governu ida agora kontinua ezisti nafatin, governu ida ne’e la’o governu jestaun, oitavu governu nian ho funsoens ne’e nafatin hela deit, so governu ida dehan katak, governu jestaun ona prontu ne’e oin seluk, no kuandu governu de jestaun signifika katak, governu ne’e husu nia dimensaun ou governu ne’e ninia dimensaun iha tiha ona no Prezidente Repúblika dekreta tiha ona, no nia dimensaun ida ne’e sai governu de jestaun, maibe governu ne’e mantein nafatin”,tenik Lú Olo.oly
