GMN TV Politika FRETILIN kesar AMP ba CNE

FRETILIN kesar AMP ba CNE

0 views

Lideransa Partidu FRETILIN kesar  Koligasaun Aliansa Mudansa ba Progresu (AMP), ba Comissão Nacional de Eleições (CNE), tanba konsidera dadaun ne’e AMP hahú halo ona pre-kampaña eleitoral ba povu iha Munisípiu sira.

Prezidenti CNE, Alcino de Araújo Barris, hateten, iha preokupasaun no kontestasaun husi partidu sira balu katak, partidu balun dadaun ne’e hahú ona atividade pre-kampaña. Tanba ne’e, CNE bolu koligasaun AMP hodi husu esklaresimentu kona ba keixa ne’ebé mak FRETILIN hato’o ne’e.

“Kontestasaun ne’ebé mak CNE simu ne’e, husi partidu FRETILIN, ne’ebé kontesta AMP katak, oras ne’e dadauk AMP halo ona pre-kampaña públiku. Maibé konfirmasaun ne’ebé mak CNE halo ho AMP katak, sira halo konsolidasaun iha sede AMP nian iha Munisípiu hotu, ba sira nia militantes no apoiante sira,”katak Alcino de Araújo Barris, ba jornalista sira iha salaun konferensia CNE Caicoli Dili, Tersa (13/03).

Prezidenti CNE ne’e afirma, AMP rasik mós promete ona katak, sira sei  la halo propaganda ka kampaña eleitoral, kuandu seidauk to’o tempu.

Nia afirma, iha enkontru ne’e, reprezentante partidu polítika sira hotu hateten katak, agora dadaun ne’e, partidu ida halo konsolidasaun ho sira-nia militante sira iha sede partidu ida-ida, la’os kampaña.

“Ba oin mak iha indikasaun ruma, hanesan partidu polítika ka koligasaun sira halo konsolidasaun ho militante sira la’os iha sede partidu, maibé halo iha fatin públiku, CNE sei halo investigasaun ba partidu ka koligasaun ne’e,” katak Alcino.

Alende ne’e, Alcino mós informa, CNE mós hetan keixa kona ba dadaun ne’e elementus balun uza atributu FDD iha Munisípiu Manufahi, hodi taka stiker FDD nian iha fatin públiku sira.

“Bainhira CNE husu esklaresimentu husi FDD, sira hateten katak, ida ne’e ema balun mak uza atributu FDD nian, hodi hafoer FDD nia naran. Tanba ne’e, dadauk ne’e CNE koopera ho Polisia hodi hasai hotu stiker FDD nian ne’ebé pesoal balun taka iha Munisípiu Manufahi,”relata nia.

Alende ne’e, CNE mós informa katak, iha keixa balu to’o sira kona ba atividades partidu balun nian, liu-liu keixa kona ba AMP nia atividade.

“Sira hato’o keixa mai CNE katak, AMP komesa la’o ho pamfletu, no lori ema balu nia naran. Maibé ami justifika ba CNE katak, aktu ne’ebé ami halo, tanba koligasaun AMP ne’e pre-eleitoral, entaun molok eleisaun, ami tenki halo konsolidasaun, entaun konsolidasaun ne’e ami halo liu husi aktus hasae bandeira iha fatin fatin,” informa Arão Noe.

Nia esplika, tanba koligasaun AMP ne’e partidu bo’ot, entaun iha tempu konsolidsaun ne’e, ema barak mak partisipa, ida ne’e mak partidu balun hanoin katak, AMP halo kampaña, maibé lalos.

Arão rekoñese katak, dalabarak sira hasa’e bandeira AMP ne’e iha fatin públiku duni, maibé ida ne’e la’os kampaña.

“Bainhira CNE aprova ona logo koligasaun nian, ami hanesan koligasaun ne’e, iha dever atu halo sosializasaun ba ami nia militante sira atu iha kuñesementu ba logo ne’e, atu sira bele koñese logo ne’e, hodi bele fasilita sira iha votasaun. Tanba ne’e mak ba ami nia militante sira ami tenki fahe ona stiker sira ne’e, para sira bele halo edukasaun sívika ba inan aman sira iha karaik. Ami promete on aba CNE katak, ami sei tuir regras hotu ne’ebé mak lei haruka,” katak Arão.

Dadaun ne’e AMP legalizadu ona husi CNE hodi haruka tiha ona ba STAE, no públika tiha ona iha Jornal Repúblika.cos


Banner

Foto

Notisia Ikus

Prezidente EDTL.EP: La fasil rezolve eletrisidade lakan-mate

October 22, 2021
Prezidente Konsellu Administrasaun Eletrisidade ...

Ramos Horta: TL presiza ospitál modernu

October 22, 2021
Eis Prezidente Repúblika, José Ramos Horta, ha...

Ekipa haat husi MJ sei aranka ba rai-liur

October 22, 2021
Ministru Justisa (MJ), Manuel Carceres, informa,...

ONU sei fó asisténsia ba ElPrez no ElPar

October 21, 2021
Reprezentante Organizasaun Nasaun Unida (ONU) se...

Kalendáriu audiénsia OJE 2022, Komisaun C aprova ona

October 21, 2021
Prezidente Komisaun C, ne’ebé trata asuntu fi...
1 2 3 654

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker