GMN TV Politika PR Lú Olo: Presiza tane ás valor rezistensia

PR Lú Olo: Presiza tane ás valor rezistensia

0 views

Prezidente Repúblika (PR), Francisco Guterrres ‘Lú Olo’, deklara, atu atinji prinsipiu lori moris diak ba povu, Estadu no sidadaun hotu-hotu tenki tane ás valores rezistensia.

“Durante ita-nia luta, ita hasoru perigu sira no ita terus hodi servi povu tomak. Ohin loron ita presiza ate ás nafatin valor sira rezistensia ninian, hodi halo ita-nia rai sai forti liu tan, ho ekonomia ne’ebé maka riku liu tan no ho moris diak liu tan ba Timoroan hotu-hotu,”PR liu husi ninia diskursu iha serimonia enseramentu kongresu RENETIL ba da-VII, iha Centro Convenções de Díli (CCD), Sabadu (17-03-2018).

Nia esplika, povu Timor-Leste proteje no defende nanis ona funu nain sira durante luta, tanba prinsipiu valor rezistensia atu tane ás povu no nasaun.

“Atu bele harii nasaun ida buras liu, forti no seguru liu tan, Estadu tenki tane ás sidadaun sira nafatin. Sé la’e, nasaun labele hakat ba oin. Balun bele sai riku liu tan, maibé ita nia nasaun sai fraku nafatin. Nuudar ema, ita hotu hakarak servisu hadi hadi’a ita-nia moris no ita nia familia, tanba ne’e, ita tenki servisu hodi dezenvolve nasaun no hari’i ekonomia ida ne’ebé diversifikadu no sustentavel,” haktuir PR, Francisco Guterres.

PR Lú Olo apela ba membru RENETIL no veteranu sira atu kaer metin valor sira ne’ebé lori Timor-Leste ba vitoria hanesan fó laran ba povu, espiritu servisu ho laran tomak, haraik an no laran moos.

“Ita presiza nakfilak valor rezistensia nian sai matadalan no dada juventude sira atu ajuda apoia Estadu ida ne’ebé moos, ho ema ne’ebé hakaas-an ba estudu no servisu ho responsabilidade husi ida-idak atu hotu-hotu iha futuru diak liu,” hatutan PR.

Xefi Estadu nasaun ne’e akresenta, hotu-hotu presiza hatene hatutan valor sira ne’e, tanba valor sira ne’e maka hametin sidadaun sira nia fiar ba Estadu, hodi hametin sira nia fiar ba instituisaun hari’I ona, hafoin restaura independensia, iha loron 20 Maiu 2002, sidadaun sira-nia fiar ba instituisaun, garante paz no estabilidade iha sosiedade maka sai riin ba unidade nasional no dezenvolvimentu.

“Ita presiza hatene haketak saida maka interese nasional no saida maka la’os. Estadu tenki servi sidadaun hotu-hotu hanesan, labele fihir ema. Tanba ne’e maka ita presiza Estadu ida ne’ebé hala’o nia knaar ho politika, meius no medidas ne’ebé loos, atu ita bele hetan ita-nia objetivu sira,” hateten PR Lú Olo.

Organizasaun RENETIL funda iha Indonesia, iha loron 20 Juñu 1988, husi estudante Timoroan sira ne’ebé eskola iha Indonesia, hodi luta kontra okupasaun Indonesia iha Timor-Leste durante tinan 24.ves


Banner

Foto

Notisia Ikus

FRETILIN: Ema balu tenta destrói amizade Taur-Alkatiri iha MedSos

September 23, 2021
Xefe bankada FRETILIN, Francisco Miranda Branco,...

Governu propoin PR Lú Olo renova EE

September 23, 2021
Governu kontinua propoin, ba Prezidente Repúbli...

Governu hakotu SS iha munisípiu tolu, Díli mantein

September 23, 2021
Governu iha reuniaun Konsellu Ministru (KM), Kua...

Governu preparadu antesipa La Niña

September 22, 2021
Sekretariu Estadu Protesaun Sivíl (SEPS), hala...

FP mate, naran nafatin iha lista liña frente, KFP tenke investiga

September 22, 2021
Parlamentu Nasionál (PN), liu hosi bankada CNRT...
1 2 3 643

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker