GMN TV Politika Programa sumba iha PN, Governu la merese ona lori ba konsulta ho povu

Programa sumba iha PN, Governu la merese ona lori ba konsulta ho povu

0 views

Bankada opozisaun Parlamentu Nasional (PN), ne’ebé kompostu husi CNRT, PLP no KHUNTO konsidera atividade Primeiru Ministru (PM), Mari Alkatiri, nian ne’ebé durante ne’e lori programa VII Governu nian ba halo konsultasaun ho povu ne’e, la merese atu halo, tanba programa VII Governu nian ne’e, sumba tiha ona iha PN.

Xefi bankada CNRT, Arão Noe mós lamenta katak, atividade Governu nian durante ne’e, gasta osan Estadu ba halo kampaña ba interese partidu nian.

“Ha’u lahatene los, atividade ne’ebé mak Primeiru Ministru halo ho membru Governu sira ne’e, lori programa se nian, tanba programa VII Governu nian ne’e, sumba tiha ona iha Parlamentu Nasional, depois programa ida la liu ne’e mak lori ba halo fali konsulta. Ida ne’e ha’u haree la’os konsulta karik, ida ne’e mini kampaña ida,”afirma Arão Noe ba jornalista sira iha PN, Segunda (26/03).

Nia hatutan, Governu ezije ema seluk atu kumpri regras, maibé nia rasik lakohi kumpri regras ne’ebé mak iha.

“Ida ne’e siginifika katak, ita hakarak hatudu liman ba ema seluk, maibé ita rasik lakohi koriji ita nia aan. Asaun ne’ebé halo husi Governu durante ne’e, asaun ida pre-kampaña eleitoral, maibé laiha Provedor Direitus Humanus no Justisa, Komisaun Funsaun Públika atu koriji ida ne’e,” katak Arão Noe.

Nia esplika, Komisaun Funsaun Públika atu koriji atividade Governu nian ne’e, tanba Primeiru Ministru mobiliza funsionáriu públiku sira hodi rona polítika partidu nian.

“Ida ne’e tuir lolos violasaun grave ba ita nia regras, tanba funsaun públika ita hatene katak, oras servisu tenki hala’o servisu ba Estadu, la’os ko’alia fali asuntu polítika, maibé ida ne’e STAE, CNE KFP husik de’it,” relata Arão Noe.

Nia haktuir, tanba ne’e mak Kay Rala Xanana Gusmão hateten ona ba públiku katak, AMP tenki manan hodi restaura fali Estadu ne’e tuir dalan los.

“Sela’e ita moris sabraut nafatin hanesan ne’e, ita lahatene los se mak Prezidenti Repúblika, se mak Primeiru Ministru, se mak Prezidenti Parlamentu Nasional no se mak Prezidenti Tribunal, tanba ita iha komando no orden ida de’it,” katak Arão.

Maibé Arão dehan, povu hatene moos katak, durante fulan nen nia laran ne’e, se mak halo povu terus no se mak defende lia los. Povu mak sei julga iha eleisaun antesipada loron 12 fulan Maiu ne’e.

“Ami AMP iha kompromisu ida katak, ami tau interese Estadu ne’e aas liu. Sei iha nasaun seluk mak ho AMP ida maioria hanesan agora dadauk ne’e, ami bele halo asaun saida de’it, mas ami lakohi halo ida ne’e, mesmu maun Xanana ho maun Taur Komandante hotu, mas nunka fó orden ami atu halo asaun ruma hodi hadau poder, tanba ami hakarak buat hotu la’o tuir lei,” relata Arão Noe.

Alende ne’e, deputadu Antoninho Bianco, husi bankada FRETILIN hateten, Governu tenki duni lori programa VII Governu nian ba konsulta ho povu, tanba tuir FRETILIN, programa ne’e diak duni ba povu.

“Programa ne’e, Governu iha direitu atu bele divulga ba povu, ida ne’e la’os parte kampaña, no ami hanesan deputadu mós, sei tu’un ba karaik atu defende programa VII Governu nian, entaun ami tenki esklarese ba povu,” afirma Antoninho Bianco.

Nia hatutan, opozisaun ne’ebé hateten programa ne’e ladiak, tenki esklarese ba povu kona ba programa ne’e nia aat mak ida ne’ebé.

“Deputadu 35 ne’e, tenki hateten ba povu katak, programa nia aat mak ne’e, para povu ne’e hatene programa ne’e diak ka aat. Povu ne’e ita labele uza fali meus seluk atu konvense fali povu, ka  ba hatauk ema karik labele,”  relata nia.cos


Banner

Foto

Notisia Ikus

Militante partidu haat afilia ba CNRT

September 28, 2021
Juventude no Veteranu husi partidu haat iha Suku...

Kongresu nasionál FRETILIN, adia ba 2022

September 28, 2021
Partidu Frente Revolusionáriu Timor-Leste Indep...

PR dekreta Ma’Huno halo’ot iha JHPM

September 28, 2021
Prezidente Repúblika (PR), Francisco Guterres L...

Governu adia aprovasaun ba realojamentu vítima DN

September 27, 2021
Governu liu husi reuniaun Konsellu Ministru (KM)...

PM Taur: TL lakon fundadór ida

September 27, 2021
Primeiru Ministru (PM), Taur Matan Ruak, hamutuk...
1 2 3 645

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker