GMN TV Politika Agostino Gomes : Jurídikamente FDD disolvidu ona

Agostino Gomes : Jurídikamente FDD disolvidu ona

Eis Prezidente Koligasaun Frente Dezenvolvimentu Demokrátiku (FDD), Agostino Gomes, deklara, koligasaun FDD la eziste no disolvidu ona iha fulan Juñu, tinan 2018,  tanba ne’e mak partidu membru ne’ebé konsege hetan asentu iha Parlamentu Nasionál, hanesan PUDD, UDT no Frenti Mudança, la’o ho bankada ketak-ketak.

Agostino haktuir, koligasaun FDD ne’ebé kompostu husi Partidu PUDD, UDT, Frenti Mudança inklui PDN ne’e disolvidu liu husi dalan ofisial, tanba bazeia ba akordu no assinatura husi líder partidu membru hotu.

“Baze legal ne’e saída? Ha’u mak Prezidente FDD, koligasaun FDD ne’e laiha tiha ona, tanba ami iha loron 17, fulan Juñu, tinan 2018 liuba, haruka tiha ona karta ba Tribunal no CNE  inklui Parlamentu Nasionál, ami hato’o disolusaun ba FDD nian. Disolusaun ne’e bazeia ba ami hotu-hotu nia akordu, partidu 4 ne’e hotu, ami hato’o ami karta dissolve ba, ha’u rasik mak halo konferensia da imprensa iha momentu ne’eba, tanba ne’e, disolusaun ne’e hahú kedas iha ne’ebá, koligasaun ne’e laiha ona, se de’it labele lori tan naran koligasaun FDD nian. Tanba ne’e mak ha’u nunka mosu ona reprezenta FDD,  laiha reunioens ruma, no iha PN rasik iha bankada tolu, partidu ida-idak harii nia bankada rasik, tanba ne’e, jurídikamente no de faktu, FDD ne’e laiha tiha ona. Ha’u dehan jurídikamente, tanba ami haruka tiha ona karta ba Tribunal, ba CNE no ba Parlamentu Nasionál, signifika FDD laiha. Foin dadaun ne’e partidu ida-idak halo nia konferensia, PUDD halo ninian, alende hanesan UDT no FM mós halo ninian”,esplika Agostino Gomes ba jornalista sira iha nia rezidensia Fomento, Díli, Kinta (12/03/2020),

Tuir eis Prezidente FDD ne’e, atu dissolve koligasaun, la presiza hetan aseitasaun husi Tribunal, tanba desizaun bazeia ba akoordu husi partidu ne’ebé forma koligasaun, hanesan UDT, PUDD, FM no PDN.

“Iha estatutu hateten tiha ona, katak FDD ne’e bele dissolve kuandu iha konkordansia entre partidu membru sira hotu, tanba uluk ami dissolve iha konkordansia ba malu, iha akoordu unanimidade, hotu-hotu asina akoordu, depois de asina mak ami haruka ba Tribunal, CNE no PN, hanoin laiha lójika se presiza hetan aseitasaun husi Tribunal, tanba ne’e ami nia direitu atu dissolve ami nia koligasaun. Importante mak iha karimbu katak, Tribunal no CNE simu ona ami nia karta”, subliña Agostino.

Eis líder FDD ne’e akresenta, kona-bá subvensaun ne’ebé fó ba FDD, nia parte lakohi fó komentáriu, tanba FDD dissolve tiha ona, no nia parte rasik rejigna aan husi PUDD, tanba ne’e konsidera kompetensia partidu 4 ne’e nia atu rezolve.

Entertantu, iha loron 17 fulan Juñu tinan 2018, estrutura no kuadrus koligasaun FDD deklara ofisialmente deklara ba públiku, liu husi konferensia imprensa, hodi dissolve ona, tanba ne’e koligasaun refere agora la eziste ona.say

 


Banner

Foto

Notisia Ikus

Portu Díli sei transforma ba zona turístika

July 30, 2021
Primeiru Ministru (PM) Taur Matan Ruak, hatete b...

PN ezije Governu responde povu nia halerik durante pandemia

July 30, 2021
Reprezentante povu sira iha Parlamentu Nasionál...

PPN la admite kansela diskusaun lei EOJF

July 29, 2021
Prezidente Parlamentu Nasionál (PPN) Aniceto Gu...

Governu aplika SS iha munisípiu Ermera no Díli ba semana rua

July 29, 2021
Governu liu husi reniaun Konsellu Ministru, Kuar...

PPN Aniceto promete sei altera LPV antes mandatu remata

July 29, 2021
Prezidente Parlamentu Nasional (PPN), Aniceto Gu...
1 2 3 622

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker