GMN TV Politika CNRT konsidera Alkatiri mak volante PR Lú Olo iha desizaun Estadu

CNRT konsidera Alkatiri mak volante PR Lú Olo iha desizaun Estadu

0 views

Xefe bankada CNRT, Duarte Nunes, hateten, durante ne’e CNRT haree katak, Sekretáriu Jeral (SekJer) Partidu FRETILIN, Marí Alkatiri mak volante hela Prezidente Repúblika (PR), Francisco Guterres Lú Olo iha nia desizaun tomak ba Estadu Timor-Leste. Tanba deklarasaun ne’ebé Marí Alkatiri fó sai, sei sai realidade iha desizaun ne’ebé PR Lú Olo sei foti ba situasaun polítika atuál.

Tuir Duarte, akontese barak ona, bainhira Alkatiri deklara asuntu ruma, sempre mosu iha desizaun ikus Prezidente Repúblika (PR), Francisco Guterres Lú Olo ninian lolos kedas ninia SekJer FRETILIN ne’e nia hanoin.

“Ne’e ida be adiviña tiha pensamentu Prezidente Repúblika nian, ne’eduni ne’e mai loloos kedas. Ne’ebé dalaruma ita bele fiar katak buat ne’ebé Dr. Marí ko’alia ne’e, buat ne’ebé mak PR sei ko’alia. Dala barak ha’u rona bebeik kuandu Dr. Marí  kuandu ko’alia, Prezidente mai ko’alia ne’e liafuan mak ne’e. Ha’u haree husi buat ne’ebé ha’u rona bebeik, imajina katak ida ne’e mak sai pozisaun Prezidente Repúblika nian”,tenik Duarte Nunes.

Deputadu CNRT ne’e afirma tan, bainhira CNRT hakarak deside liu ba Eleisaun Antesipada (EA) hanesan pozisaun FRETILIN ne’ebé deklara husi SekJer FRETILIN katak prontu ba EA, no PR fó opsaun tan atu partidu sira halo movimentu tan, hodi halo koligasaun forma governu foun.

“Ita kuandu dehan hakarak eleisaun antesipada, ita lalika aprezenta tan koligasaun, ita kuandu haree PM aprezenta ona demisaun, signifika viabiliza ona atu forma governu foun. Agora governu foun mós tenke mai husi koligasaun ida, tanba ita hatene laiha partidu ida mak maioria, entaun koligasaun iha ona,  iha prosesu atu tuir nia dalan ne’e ba forma governu. Dr. Marí kuandu ko’alia atu ba eleisaun antesipada ne’e nia hatene, ha’u mós fiar katak nia kuandu ko’alia ne’e, PR sei ko’alia hanesan ne’e,”subliña polítiku ne’e.

Iha fatin hanesan, vise xefe bankada FRETILIN, Francisco Miranda Branco, rejeita deklarasaun husi bankada CNRT nian ne’e, tanba xefe Estadu sei foti desizaun bazeia ba interese no situasaun atuál Estadu nian, la’ós tuir fali deklarasaun Alkatiri nian ka desizaun partidu nian.

Tanba ne’e, nia parte konsidera deklarasaun CNRT nian hanesan pre-konseitu ne’ebé la loos.

“Hanoin ida ne’e pre-konseitu ne’ebé laloos, hanoin relasaun SekJer partidu FRETILIN nian laiha relasaun ho desizaun xefe Estadu nian, ida ne’e mak ita tenke hatúr sasán sira ne’e iha nia fatin. Ita tanba de’it Dr. Francisco Guterres Lú Olo Prezidente partidu FRETILIN nian, nia desizaun hotu husi FRETILIN no sekretáriu jerál FRETILIN nian”,akresenta Francisco Branco.

Atu responde ba opsaun ne’ebé xefe Estadu fó, hodi prevene rekursu ikus nu’udar mós opsaun husi xefe Estadu, liu-liu opsaun atu partidu polítiku sira halo movimentu,  CNRT prezide ona koligasaun foun hamutuk ho partidu KHUNTO, Partidu Demokrátiku, PUDD, UDT no Frenti-mudança, hodi hakat ba forma governu foun, nu’udar alternativa atu hakotu impase polítiku ne’e.

Ho nune’e, maske xefe Estadu seidauk dekreta autorizasaun ba demisaun atual Primeiru Ministru, Taur Matan Ruak, maibe  iha Semana ne’e, koligasaun foun refere, sei aprezenta Primeiru Ministru indijitadu ba Prezidente Repúblika, Francisco Guterres Lú Olo.Say


Banner

Foto

Notisia Ikus

PR Lú Olo preokupa instabilidade kontinua mosu iha rai-laran

December 2, 2021
Xefe Estadu Maior Jenerál FALINTIL-Forsa Defeza...

PN hahú diskute proposta OJE 2022 billiaun 1.675 iha faze jeneralidade

December 2, 2021
Parlamentu Nasionál (PN) kinta lejislatura, Kua...

PM Taur: Situasaun Tolu Implika PIB TL tun ba Negativu 8

December 2, 2021
[caption id="attachment_43754" align="aligncenter"...

OJE 2022, Governu Prevé Millaun 25 ba Subsídiu FP

December 2, 2021
Parlamentu Nasionál (PN) Kinta lejislatura, Kua...

KM Aprova Projetu Deliberasaun no Ezonerasaun ba Calisto dos Santos “Coliati”

December 2, 2021
[caption id="attachment_52724" align="aligncenter"...
1 2 3 668

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker