Governu liu husi Konsellu Ministru (KM), aprova ona orsamentu duodesimal ba fulan Marsu nian hamutuk, tokon USD 116.449.
Orsamentu duodesimal ne’e aprezenta husi, Ministra Finansa Ezersisiu, Sara Lobo Brites, ne’ebé aprezenta porjetu deliberasaun husi Governu, no KM aprova kona-ba tetu orsamental ba fulan Marsu iha ámbitu rejime duodesimal ho valor tokon USD116.449.057.
Ministra Finansa Ezersisiu, Sara Lobo Brites, hateten, orsamentu ba fulan marsu hanesan ho montante ne’ebé aprova iha fulan Janeiru no Fevereiru, Tokon USD116.449 ninia distribuisaun tuir kategoria mós hanesan, salariu vensimentu millaun USD17. 852, bens servisu millaun USD 38 transferensia públika millaun USD 26.591 no kapital dezenvolvimentu millaun USD33, iha Dotasaun Orsamentu Temporaria (DOT), marsu iha nafatin la inklui kapital menor.
Ministra Finansa Ezersisiu, aprofunda tan katak, ida ne’e mak Konsellu Ministru delibera no orsida loraik (horseik-red), sei lansa ba sistema no aban (ohin-red), atu nune’e aban ministeriu sira hahú halo ezekusaun orsamentu ba fulan marsu nian.
“Husi Ministériu Finansa nia parte ita atribui DOT, bazeia ba orsamentu tinan 2019 nia sasukat mos hanesan, entaun kategoria sira ne’ebé hanesan, salariu vensimentu liu-liu selu ba mensal nian ita kobre ona, nesesidade kada instituisaun bazeia ba orsamentu ne’ebé presiza, ne’e duni ami la haree katak ministeriu finansas presiza atu halo asaun ruma kona-ba ida ne’e, tanba ne’e sira mak tenke hatene jere sira nia orsamentu tanba DOT ita aplika ba fulan ida de’it, to’o fim do mes ita tenki taka”,dehan, Ministra Finansa Ezersísiu, Sara Lobo, iha Palásiu Governu, Kuarta (04/03/2020).
Governante ne’e esplika, ministériu sira presiza servisu maka’as, tanba la normal hanesan orsamentu bai-bain, maibé ne’e presiza sukat tempu ne’ebé mak fulan ida nian.
Ezemplu fulan fevereiru nia loron ne’e menus liu tan, entaun tenke haka’as aan servisu, atu nune’e molok atu taka bele selu ema hotu nia saláriu.
Kona-ba kontratu foun nia parte laiha informasaun, maibé kontratu husi saláriu vensimentu, no bens servisu nia distribuisaun bazeia ba tinan 2019 ne’e laiha problema ruma.
“Kona-ba saldo aset Estadu ba fulan Marsu saldo naton, iha millaun USD 215 ita aprova, ita nia DOT fulan marsu USD116 ba oin se karik, saldo ba fulan Abril ne’e konforme desizaun husi lideransa sira, bainhira saldo la to’o ita iha mekanizmu presiza aprezenta fali iha KM, no Parlamentu Nasionál, bainhira la to’o”, dehan, Sara Lobo.Cin
