Jurista Timor-oan, Manuel Tilman husu, ba koligasaun foun atu labele aprezenta fali lista membru governu rejeitadu ba Prezidente Repúblika (PR) Francisco Guteres Lu Ólo.
“Ha’u kontente maun bo’ot Xanana ho Ramos Horta nia kolaborasaun rasik hodi halo kontaktu ba mai ohin loron ita koligasaun foun mai, hein katak iha tempu badak hili ema los ba fatin los la prejiza repete fali ema nain 9 ne’ebé ke ba atu ba soke malu fali ho Prezidente Repúblika, la prejiza soke malu ho prezidente repúblika impede povu timor, tamba povu timor atu sai feliz no dezenvolvimentu, la prejiza ona ba eleisaun antesipada tanba koligasaun parlamentar post eleisaun AMP antes de eleisaun maka manan ho 49, ne’e la prejiza 49% husi rezultadu eleisaun nian, maibé ne’e iha parlamentu nasionál liu 34 asentu, garante hela governu ne’e funsiona, klaru ke maun boot xanana tenki hili ema los no garante dezenvolvimentu ne’e ba oin”, Jurista, Manuel Tilman ba Jornal Diáriu Nasional iha nia rezidensia Gardeng Beach, Sabadu (29/02).
koligasaun foun ne’ebé lidera husi prezidente partidu CNRT, Kayrala Xanana Gusmão, asina ona akta koligasaun foun iha sabadu loron 22 fulan feveiru, koligasaun refere, kompostu husi partidu CNRT, Khunto, PD, PUDD, UDT no Frente Mudansa.
Demisaun PM iha PR nia liman
Jurista, Manuel Tilman, hateten, dezisaun ba karta demisaun Primeiru Ministru (PM), Taur Matan Ruak nian, iha Prezidente Repúblika (PR) Francisco Guteres Lu Ólo nia liman.
Manuel Tilman, hato’o lia hirak ne’e ba GMN iha nia rezidensia Garden Beach-Praia dos Coqueiros, Díli, Sábadu (29/02).
“Kona-ba demisaun Primeiru Ministru agora depende ba Prezidente Repúblika tanba problema la’os iha governu, maibé iha mós governu tanba AMP koligasaun pre-eleitorál atu funsiona, atu existe atu kontinua ba oin, la’os tanba deklarasaun iha de’it tribunal rekursu la’e, ezistensia iha parlamentu nasionál atu apoia asuntu 3 ida programa polítiku, ida mak orsamentu jeral do estadu la, liu no ida seluk mak lei estruturante nasaun la to’o aprezenta, tanba ne’e mak falla, signifika la’os dehan katak la eziste, exite formalmente mais de faktu iha parlamentu nasionál laiha apoiu parlamentar tomak, uluk sira promote iha kampaña eleitorál lori ukun ba to’o rohan maibé la to’o rohan, senhor primeiru ministru aprezenta ninia demisaun ba prezidente repúblika tuir konstitiuisaun artigu 112 aliña B”,dehan Manuel Tilman.
Primeiru Ministru, Taur Matan Ruak, hato’o ona karta demisaun ba Prezidente Repúblika, iha Tersa (25/02).
Antes ne’e, Prezidente Repúblika, Francisco Gueteres Lu Ólo, deklara, Taur Matan Ruak kontinua asume kargu nu’u xefe governu, tanba governu da-ualu nafatin funsiona, no governu ida laiha bainhira Primeiru Ministru hatama karta demisaun tuir KRDTL, artigu 112.Ina
