GMN TV Politika Osan ba fulan Abril la sufisiente, PPN sujere Governu hato’o sedu pedidu levantamentu

Osan ba fulan Abril la sufisiente, PPN sujere Governu hato’o sedu pedidu levantamentu

0 views

Prezidente Parlamentu Nasionál (PPN), Arão Noe de Jesus da Costa Amaral, sujere ba Governu da-ualu ne’ebé lidera husi Primeiru Ministru Taur Matan Ruak, atu hato’o sedu pedidu ba levantamentu orsamentu duodésimu husi fundu petrolíferu, hodi sustenta mákina estadu durante fulan Abril ba oin.

Tanba saldo atual la sufisiente ona, hodi finansia funsionamentu mákina estadu fulan Abril ba oin.

“Ida ne’e preokupasaun ida ne’ebé ita nia ministra Finansa interina fó sai, katak ita nia saldo atuál lato’o ona atu finansia orsamentu duodésimu ba fulan Abril nian,

Tanba ne’e mak ami PN hein, se governu submete pedidu ida mai PN autoriza hodi halo levantamentu, PN prontu, no ami hein sei fó prioridade ba ida ne’e, tanba impaktu ba interesse nasionál, ba finansiamentu órgaun Estadu sira-nia funsionamentu tomak,

Tanba ne’e mak fiar katak bankada hotu sei fó importansia ba ida ne’e, tanba ida ne’e liga ho vida nasaun nian.

Hanesan uluk, iha 2018,  kuandu governu osan laiha, halo pedidu ida hanesan proposta de lei ida,  hodi foti osan kuaze millaun USD 140, atu finansia Estadu iha fulan rua nia orsamentu duodésimu,

Agora mós bele akontese, kuandu osan lato’o, kuandu saldo ka orsamentu tinan kotuk nia lato’o,

Tama fulan Abril governu bele halo pedidu mai, depois PN sei halo prosesu, hau sei konsidera ida ne’e, no sei tau iha karakter urjensia,

Para nune’e aprova lalais tiha molok meadu fulan Marsu nian, atu nune’e governu bele iha autorizasaun ona, depois Prezidente Repúblika promulga, no governu bele iha autorizasaun atu halo levantamentu orsamentu hosi fundu hodi kobre duodésimu fulan Abril nian.”deklara PPN Noe ba jornalista sira, iha PN, Tersa(10/03/2020).

Líder másimu segundu órgaun ne’e afirma, lei la fó dalan ba governu atu bele foti direta osan hosi fundu petrolíferu, se bainhira la hetan autorizasaun husi Parlamentu Nasionál (PN) no la promulga hosi xefe estadu.

Maske nune’e foti osan tuir kálkulasaun bazeia ba Orsamentu Jerál Estadu ne’ebé foti iha tinan anterior.

 “Tuir lei labele, se di’akliu ita kumpri regras, tuir lei jestaun finanseira no lei fundu petrolíferu, hateten katak so liu hosi ka hetan autorizasaun PN nian, no tenke iha asaun ida, ho votasaun iha plenária. Maibe kona-bá montante, depende ba governu nia kálkulu, agora dadauk karik orsamentu ne’ebé presiza parese kuaze millaun USD 116, para finansia duodésimu ba fulan ida. Se foti ba fulan ida, USD millaun 116, se foti ba fulan rua, millaun USD 232, maibe kabe ba governu presiza ba fulan hira, hodi hein fali aprovasaun Orsamentu Jerál Estadu (OJE)2020 nian.”dehan Arão Noe.

Tanba ne’e, PPN Arão hakuir, depende kálkulu governu nian, hakarak foti ba fulan hira nian, depois PN mós autoriza hakarak utiliza ba fulan hira, ne’e entre órgaun rua mak tenke aserta didi’ak.

“Ha’u-nia hakarak ita konkorda dala ida para ita foti ne’e kálkulu kedas to’o Orsamentu Jerál Estadu 2020 nian aprova, maibe ida ne’e la’os kompetensia ha’u nian, tuir ha’u-nia hakarak de’it, aprovasaun ne’e kompetensia plenária nian, hodi autoriza governu atu foti osan duodésimu ne’e ba fulan hira? Kona-bá orsamentu duodésimu, laiha determinasaun ruma, maibe depende de’it ba kálkulu orsamentu anterior nian. Ezemplu ita iha OJE 2019 ita iha total $1.6 billoens, husi ne’e mak dívida fali ba 12, me’e mak hetan $116 milloens kada fulan ne’e, tanba ne’e, tenke gasta duni iha dentru ida ne’e, labele liu, orsamentu duodésimu, husi orsamentu total anterior, Orsamentu anterior dividir ba 12, ba fulan ida nian, foti to’o ida ne’e de’it, labele liu ida ne’e, se foti liu ida ne’e, viola ona lei, másimu mak bele ezekuta ida ne’e, maibe gasta la hotu ne’e laiha buat ida, maibe prevê ba fulan oin ne’e tenke ho montante ida ne’e nafatin, labele liu ida ne’e,  se tun de’it bele, maibe labele liu ida ne’e, risku ona, bainhira ultrapassa lei ne’e”esplika Arão.

Líder órgaun leijsladór ne’e garante, governu sei fó prioridade ne’e ho sériu, no bele aprezenta pedidu ho lalais antes fulan Marsu ne’e termina, nune’e PN bele prosesa dadauk ona faze por faze.

 “Se ita ko’alia ona kontestu lei, tenke liuhosi PR hetan promulgasaun, PN labele autoriza de’it governu atu foti, Governu aprezenta mai PN, PN debate no aprova, depois haruka ba PR promulga mak foin bele em vigór para bele autoriza ona governu bele halo levantamentu. Tanba ne’e mak, se governu presiza duni atu halo levantamentu ba fundu, para kobre, hein katak,  husu governu fó prioridade ba ida ne’e, para bele apresenta ona proposta de lei ida mai PN, para nune’e prosesa ona, molok fim do mês ita lei ne’e tama ona iha vigór, para governu halo de’it ona levantamentu ba fundu. Hanoin ba interese nasionál nian, tanba ne’e duodésimu, se sumba ita orsamentu laiha, estadu labele funsiona. Hanoin ida sei la hanoin to’o iha ne’ebá, tanba lei orsamentu ba tinan ida, maibe ida ne’e duodésimu ba fulan ida-ida. Se prosesu normal lei ne’e lori tempu, maibe lei sira hanesan nene’e nia artigu la barak ida, loron ida ita bele debate iha plenária aprova hotu kedas, ne’e laiha problema. Tempu PR konstituisaun hateten dehan 30 dias, maibe kabe ba PR hakarak halo to’o 30 dias ou hakarak iha tempu loron ida ou rua nia laran promulga ne’e kompetensia órgaun ida-idak nian,”Subliña Amaral.

Antes ne’e, Ministra Finansa Interina, Sara Lobo Brites, deklara, husi saldo tezouru ka restu husi tinan anterior (2019) to’o 30 Janeiru tinan 2020 sei iha millaun USD 254, iha millaun USD 116 resin mak finansia duodésimu ba fulan Fevreiru no Marsu.

Tanba ne’e, governu tenke hato’o pedidu hodi halo levantamentu osan ba duodésimu fulan Abril ba oin to’o hetan aprovasaun OJE 2020.Say


Banner

Foto

Notisia Ikus

PPN: Singapura rejeita TL adere ba ASEAN ne’e normál

August 5, 2021
Prezidenti Parlamentu Nasional (PPN) Aniceto Gut...

FRETILIN husu Governu hadi’ak implementasaun SB

August 5, 2021
Bankada FRETILIN, sujere Governu atu avalia impl...

Governu laiha kapasidade ezekuta OJE

August 5, 2021
Deputada bankada CNRT, Bendita Moniz Magno, kons...

Kevin Blackstone la kontente husik TL

August 5, 2021
Embaixadór Estadu Unidu Amérika (EUA), Kevin B...

Governu seidauk rekupera estragu sira husi DN

August 4, 2021
Parlamentu Nasionál (PN) kestiona, besik ona fu...
1 2 3 625

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker