Reprezentante povu iha uma fukun Parlamentu Nasionál (PN) kestiona maka’as kona-bá eis Ministru balun ne’ebé to’o agora sei kontinua hetan eskoltu husi Polísia Nasionál Timor-Leste (PNTL), unidade Corpu Seguransa Pesoál (CSP).
“Relasiona ho eskoltu, ha’u hanesan Liquiça-oan lamenta, eis ministru ne’ebé iha kareta ho kor me’an iha eskoltu, ha’u la tane ema ne’e, sé nia eskoltu ida privadu no ida husi polísia. Ami husu ba Governu, tanba sá mak eis ministru mós iha tratamentu hanesan ne’e, piór ainda kareta polísia mak probidénsia ba señor ne’e, ida ne’e nasaun ne’ebé ita dehan Estadu Direitu Demokrátiku, demokrásia tenke aplika ho loloos, labele balu lejizu no balun hetan tratamentu espesiál, ami la konkorda”, deputada bankada FRETILIN, Lídia Norberta liu husi plenária iha PN, Segunda (02-03-2020).
Husi sorin seluk, deputadu bankada PLP, Noé da Silva, husu ba Governu atu halo klarifikasaun kona-bá legalidade atribuisaun eskoltu ba eis Ministru sira refere.
“Ha’u hakarak ko’alia kona-bá eis Ministru sira ne’ebé iha nafatin eskoltu, iha duni lei ruma garante eis Ministru nafatin iha eskoltu ou la’e, Ministru tenke fó esplikasaun ba ha’u eis Ministru iha nafatin eskoltu, ita ta’uk maske sira selu, maibé instituisaun PNTL la’ós privadu ne’e mak eis Ministru iha nafatin eskoltu”, hateten Noe
Hatán ba preokupasaun ne’e, Ministru Reforma Lejislativa no Asuntu Parlamentár (MRLAP), Fidelis Magalhães, klarifika, tuir dekretu Governu atribui eskoltu ba Ministru sira la’ós ba eis Ministru.
“Ami labele inventa dehan dekretu temi, maibé dekretu Governu la temi Ministru kompetente mós bele halo atu atribui seguransa ba personalidade ne’ebé presiza seguransa, tanba foin la-lais ne’e, iha Diretór balun Governu deside fó seguransa, sira aprezenta difikuldade bainhira sein seguransa sira nia servisu ho forma di’ak“, tenik governante ne’e.
Maske deputadu sira kestiona maka’as kona-bá eis Ministru sira ne’ebé sei kontinua hetan eskoltu husi PNTL, unidade CSP, maibé la temi eis Membru governu sira ne’e nia naran. ety
