GMN TV Economia PN susar iha ezekusaun duodésimu

PN susar iha ezekusaun duodésimu

0 views

Sekretária Jerál Parlamentu Nasionál (PN), Cedelizia Fária dos Santos, relata, orsamentu duodésimu ne’ebé governu aloka ho montante millaun USD 1.2 kada fulan ne’e, difikulta tebes PN atu ezekuta, tanba konsidera montante refere ki’ik tebes.

Entertantu, husi duodésimu fulan Fevereiru nian, PN konsege ezekuta ona USD 61%, liu-liu saláriu no transferensia públika.

“To’o 28 Fevereiru, ita gasta ona 61%, persentajen bo’ot liu mak iha transferensia públika, tanba orsamentu ida ne’e ita halo transferensia ba bankada sira, entaun bainhira DOT ne’e ami simu, pedidu tama, ami halo kedas transferensia, entaun ninia peresentajen ne’e ita atinji 100%, tuir fali persentajen bo’ot mak saláriu no vensimentu, tanba saláriu ema hotu halo servisu, ita halo transferensia ba ida ne’e, depois iha persentajen tuir mak bens servisu nian. Ami mós hetan osan iha kapital dezenvolvimentu, maibé montante ne’e ki’ik-oan tebes, tanba ne’e, maske tuir planu ne’e atu halo rehabilitasaun ba fatin servisu ida, maibé ho montante ki’ik-oan, ita labele halo buat ida, tanba ne’e mak pursentajen husi kapital dezenvolvimentu zero, ita la ezekuta ida, inklui mós kapital menor, ita la simu osan iha ne’ebá, klaru katak, ita la halo ezekusaun iha kapital menor”, tenik Fária.

SEKJER PN relata, saldo duodésimu PN nian, la sufisiente ona ba fulan Abril, tanba ne’e presiza aloka foun, bainhira plenária autoriza.

“Janeiru to’o marsu total ne’ebé mak PN simu ona, hamutuk USD 3.6 milloens, tanba kada fulan ne’e, pakote ida ne’ebé mai ho nia montante ne’ebé hanesan, USD 1.2 milloens. Husi orsamentu ne’e, ami mós hetan difikuldade iha ezekusaun, tanba iha kada komisaun sempre halo fiskalizasaun ba Munisípiu, dala ruma fulan ida hala’o fiskalizasaun iha Munisípiu rua ou tolu, maibé DOT ne’e ho montante ida ki’ik-oan tebes, entaun agora fulan ida komisaun ida bele halo fiskalizasaun ba Munisípiu ida de’it, ida ne’e mak difikuldade ne’ebé mak PN hasoru. Ita hotu hatene katak, iha 2020, kada komisoens sira la tau sira-nia osan viajen estranjeiru nian, maibé tanba orsamentu duodésimu ne’e bazeadu de’it ba orsamentu 2019 nian ne’ebé mak aloka mós orsamentu ba viajen estranjeiru, entaun iha DOT ne’e mós ami kontinua simu viajen estranjeiru nian, maibé ita labele ezekuta, tanba laiha planu ba 2020 nian, tanba ne’e mak iha bens servisu nian, kona-bá viajen estranjeiru, ninia ezekusaun kuaze zero, maibé ita simu nafatin montante ida ne’e. Ami mós iha difikuldade atu halo transferensia hodi chekup ba deputadu sira, maibé montante ida ne’ebé ami simu ki’ik-oan tebes, entaun ami labele halo transferensia ba deputadu sira, inklui mós manutensaun ba sira-nia viatura, kategoria bo’ot ne’e mak PN halo, maibé montante ne’ebé natoon, transferensia direta ba deputadu sira, ida ne’e mós ami labele halo, tanba orsamentu ne’e ki’ik-oan tebes”, afirma Lizia.

Eis diretora ezekutivu UNESCO ne’e subliña, kada komisoens ne’ebé halo fiskalizasaun ba Munisípiu, hetan alokasaun rihun 4 to’o 5 ba kada fiskalizasaun.

“Mais ou menus 4 ate 5 mil, ba kada komisoens, tanba deputadu sira ba kuaze iha semana ida nia laran, tanba ba fiskalizasaun ne’e la’os deputadus de’it, maibé ema lubuk ida iha ne’ebá, inklui mós tékniku sira iha komisoens, inklui radio PN nian no motorista, inklui média sira seluk, tanba ne’e mak kada sira la’o kuaze loron 3 ou 4 hanesan ne’e, sira bele gasta to’o USD 4 to’o USD 5 mil. Sira fila husi viajen mai, sira sempre halo relatóriu, depois relatóriu ne’e sempre hatama liu husi sekretariadu, depois enkamina ba PPN, no ikus aprezenta iha plenária, la’os ba fiskalizasaun loos de’it”, akresenta Cedelizia.

Antes ne’e ministra finansa interina, Sara Lobo Brites informa, orsamentu la sufisiente ona ba fulan Abril, tanba ne’e, presiza halo pedidu ba PN hodi hetan autorizasaun ba levantamentu husi fundu petrolíferu.say


Banner

Foto

Notisia Ikus

CESLINK bele ona sai empreza telekomunikasaun iha TL

September 17, 2021
Ministériu Transporte Komunikasoins (MTK), Dire...

Governu sei hadia infraestrutura ne’ebé estragu husi DN

September 17, 2021
Primeiru Ministru (PM) Taur Matan Ruak hatete, G...

Fulan oin, ró Berlin-Ramelau to’o TL

September 17, 2021
Ministru Transporte no Komunikasaun (MTK) José ...

Posibilidade Díli implementa uluk new normal

September 17, 2021
Posibilidade Munisípiu Díli, Governu sei imple...

Komisaun rekrutamentu publika ona naran kandidatu F-FDTL foun

September 16, 2021
Komisaun rekrutamentu FALINTIL-Forsa Defeza Timo...
1 2 3 640

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker