Uma fukun Parlamentu Nasionál (PN), iha Segunda, loron 23, fulan ne’e, suspende diskusaun ba pedidu urjénsia ba proposta lei númeru 12/V 20 treseira alterasaun lei númeru 13/2009, loron 21, fulan Outubru kona-bá Lei Jestaun finanseira (LJF).
Durante diskusaun manas kona-bá LJF kuaze oras hat (hahú husi tuku 15:00 to’o 18:15) ne’e derepente ahi mate, ho nune’e, Prezidente PN, Arão Noe foti desizaun hodi suspende ajenda no sei kontinua diskusaun iha ohin loron (24/3).
“Ahi moris mak ita foin halo diskusaun no halo votasaun, nune’e halo kontajen ne’e di’ak, sé la’e bele hamosu komplikasaun, tanba ne’e meja foti desizaun adia ba aban (24/3)“, Prezidente PN ne’e ba jornalista sira iha PN, Segunda (23-03-2020).
Xefe Órgaun Lejislativu ne’e esplika, PN iha rasik jeradór, maibé avária, nune’e tenke suspende mai ohin (24/3) loron.
“Ho nune’e lamenta tebes ho ahi ne’ebé mate, maibé kona-bá atu kontaktu hodi halo konfirmasaun ho tékniku EDTL ona ou seidauk, ida ne’e kompeténsia tékniku sira husi PN mak hatene”, tenik Arão.
Lei Jestaun Finanseira (LJF) ne’e Konsellu Ministru (KM) aprova, iha loron 11, fulan Marsu ne’e.
Durante diskusaun ba LJF ne’e mosu diferénsia opiniaun husi partidu FRETILIN no PLP kontra CNRT, PD, KHUNTO, PUDD no UDT.
PN simu pedidu levantamentu FP husi Governu
Prezidente Parlamentu Nasionál (PN), Arão Noe, informa mós katak, dau-daun ne’e, PN simu ona pedidu levantamentu Fundu Petrolíferu (FP) husi Governu.
“Pedidu levantamentu Fundu Petrolíferu (FP) PN simu husi Governu ohin (23/3) loraik, tanba ne’e, sei baixa ba komisaun no mai para ita aprova tama kedas ba iha espesialidade“, Prezidente PN ne’e liu husi plenária iha PN, Segunda (23-03-2020).
Entretantu meja PN sei baixa iha komisaun no sei lori ba reuniaun líder bankada, hodi halo ajenda, antes lori ba debate iha plenária. ety
