Prezidente Repúblika (PR), Francisco Guterres Lú Olo, seidauk foti medida ruma atu dekreta prezidensial ba Estadu Emerjensia, tanba Xefi Estadu seidauk simu proposta husi governu hodi foti desizaun.
“Bainhira simu proposta ne’e, mak ha’u sei halo kedan prosesu hodi rona konselhu Estadu no konselhu defeza no seguransa nasional nia opiniaun, no submete ba parlamentu nasionál nia autorizasaun”, hatete Prezidente Repúblika, Francisco Guterres Lú Olo, hodi hato’o mensajen kona-ba Corona Virus Sesta (20/03/2020), iha Salaun Xina Palásiu Prezidensial Bairo Píte, Díli.
Xefe Estadu afirma, governu prepara dadaun fatin sira ne’e no tenke foti medidas ho kuidadu hotu, atu fatin sira ne’e labele fó risku ba komunidade sira ne’ebé hale’o iha ne’eba.
Xefe Estadu mós husu ba entidades hotu atu fó apoiu ba governu hodi implementa medida sira ne’e, hodi proteje komunidade no pais tomak.
“Ne’e katak, ema ne’ebé suspeitu ka iha ona infesaun, tenke tama kedas iha fatin governu prepara. Ita presiza apriende husi nasaun esperensia diak nasaun sira seluk nian, ne’ebé hatene ona oinsa prevene ka kombate moras Covid19, hanesna Xina, Singapura, Vietname, Singapura no Macau hatudu ona dalan diak, ita tauk to’o sai pániku, la ajuda ita hasoru virus ne’e, importante mak oinsa ita prepara aan no ajuda maluk sira seluk prepara sira nia an mós, iha Munisípiu hotu-hotu, liu-liu ita-nia maluk idozu sira, ne’ebé sofre hela ba moras seluk no ita-nia membru komunidade sira ne’ebé vulneravel liu”, subliña Lú Olo.
Prezidente Repúblika akresenta, Estadu no sosiedade tomak tenke fó liman ba malu atu prevene no kontrola coronavirus, karik tama Timor-Leste.oly
