Xefe bankada Partidu Demokrátiku (PD), António da Conceição Kalohan, husu meza Prezidénsia Parlamentu Nasionál (PPN) no konferénsia líder bankada atu ajenda hodi hasai ona nia imunidade, tanba nia parte prontu ona atu ba hatán iha Tribunál, nu’udar sidadaun ne’ebé iha responsabilidade ba Estadu.
Sekretáriu Jerál PD ne’e justifika, imunidade ne’e tuir loloos hasai ona iha fulan Dezembru tinan kotuk, maibe la konsege, tanba diskusaun Orsamentu Jerál Estadu tinan 2021 nian.
“Ha’u dehan karta ne’e mai tiha ona, Prezidente mós hatán, no horibainhira ha’u dehan ona katak, tuir loloos atu foti levantamentu imunidade ne’e iha Dezembru 2020 ne’e, maibe seidauk foti, la’ós tanba PN mak lakohi, maibe tanba debate OJE. Maibe agora ha’u ko’alia tiha ona ho PPN, atu dia 08 de Abril ha’u ba, maibe atu ajenda ne’e tenke liuhosi konferénsia líder bankada sira. Ha’u rasik ohin husu ona ba Prezidente komisaun A, atu mós fó hanoin ba konferénsia, atu ha’u bele ba, tanba ha’u ema ne’ebé responsavel ba vida nasaun nian, ha’u la’ós ema ne’ebé konvidadu mai iha ne’e, atu hases ha’u-nia an hosi responsabilidade Estadu nian”,dehan.
Kazu ne’e akontese iha tinan 2014, wainhira líder PD ne’e sei asume kargu nu’udar Ministru Komersiu, Industria no Ambiente .
Ministériu Públiku arguidu sira, ho krime pekulatu no krime partisipasaun ekonomia.Say
