Liu hosi deklarasaun bankada, deputadu António Verdial, husi bankada KHUNTO, ezije Governu, atu lori fila médiku 23 ne’ebé finaliza ona estudu espesialidade iha Cuba, dezde fulan Dezembru, tinan 2020.
“Bankada KHUNTO hakarak hato’o lamentasaoens, ba VIII Governu Konstitusional, kona-bá atraza repatriasaun médiku Timor-oan iha Cuba atu fila mai Timor-Leste. Bankada KHUNTO mós agradese ba apoiu inkondisional, ne’ebé oferese hosi estadu liuhosi MS durante tinan 3 resin, ba ita nia médikus Timor-oan, hodi ba hala’o estudu iha Cuba. Atúal médiku Timor-oan hamutuk 23 mak sei iha Cuba, hala’o hela estudu iha espesialidade área klínika, hosi montante ne’e, nain 17 finaliza ona nia estudu desde Dezembru 2020, no nain 15 mak simu ona diploma, no hein hela repatriasaun, atu fila mai Timor-Leste to’o ohin loron, maibe fulan tolu ona mak sira hein hela iha rai Cuba. Hosi sira nain 15 ne’e, kompostu hosi espesialidade kardiolojia nain 3, terapia intensiva nain 4, neufolojia nain 3, neurolojia nain 1, endokrinolojia nain 2, no imeiznolojia nian 1. Haree ba kondisoens real ita nia espesialista médiku timoroan ne’ebé remata ona estudu, agora dadaun sira presiza tebes tulun hosi ita nia governu hodi sir abele fila lalais mai Timor-Leste. Sira nia repatriasaun importante tebes, hodi fó kontribuisaun asistensia liuhosi ministériu saúde, ba ita nia povu liu-liu iha pândemia ne’e, iha ne’ebé ita nia nasaun presiza tebes rekursu humanu.”afirma Prezidente komisaun G ne’ebé trata asuntu edukasaun ne’e, liuhosi deklarasaun bankada Khunto nian, Tersa(16/03/2021).
Nune’e, deputada PLP, Domingas dos Santos, reforsa katak, prezensa médiku Timor-oan hirak ne’e, bele ajuda servisu iha situasaun atúal pándemia COVID-19 ne’ebé Timor-Leste enfrenta hela.
“Preokupasaun ida ne’e, atan ami mós simu hosi ita nia estudante bolseirus ne’ebé mak remata ona iha Cuba, sira (estudante) lamenta teb-tebes, tanba ita fasilita professor sira hosi portugál bele mai halo servisu iha ne’e, maibe ita nia médiku sira ne’ebé mak remata ona sira nia estudu iha Cuba, sira perde Vo dalarua, sira sente sira nia prezensa mós importante tebes, atu bele ajuda servisu iha pândemia ida ne’e, sira mós hakarak fó sira nia kontribuisaun.
Tanba ne’e hau konkorda ho deklarasaun bankada ne’e, hodi husu governu atu tau atensaun ho sériu.”dehan.
Alénde ne’e, deputadu PD, António da Conceição Kalohan mós husu Governu atu tau atensaun ba estudante Timor-oan ne’ebé vistu mate, maibe difísil atu renova.
“Presiza duni atu repatria tiha estudante sira hosi Cuba ne’e, ida mós husu Governu atu iha medida kriativas ruma kona-bá estudante sira ne’ebé visa mate iha estranjeirus.”reforsa eis ministru edukasaun ne’e.
Médiku Timor-oan 23 ne’e, ba hala’o estudu espesialidade, dezde tinan 2018, no nain 17 finaliza ona nia estudu dezde fulan Dezembru, tinan 2020 liuba.Say
