GMN TV Politika Mari Alkatiri: FRETILIN sei hasa’e osan idozu sira

Mari Alkatiri: FRETILIN sei hasa’e osan idozu sira

0 views

Kampaña aberta partidu ho númeru sorteiu hat (4) FRETILIN, iha Munisípiu Lautem, promete hasa’e osan iduzu sira, kria kondisoens ba kbiit la’ek sira, oferese bolsa da mãe ba familia kbiit laek sira inklui veteranus no mártires nia oan sira.

Sekretariu Jerál Partidu istóriku FRETILIN, Marí Alkatiri aprezenta programa Governu ne’e iha komísiu jerál ne’ebé konsentra iha kampu Independénsia Lospalos-Lautem, Kuarta feira (18/04/2018).

Maski kampaña polítiku hahú iha tuku 14:00 OTL, maibé masa militante no simpatizante sira, iha dadersan deit halo uluk marsa haleu Kapitál Lautem.

Kampo futebol ne’ebé lor-loron haree hafalun ho duut matak, loron ne’e nakfilak tiha ba kor mean, tanba suli nakonu ho ema militante no simpatizante FRETILIN ho bandeira no kamiza kor mean, kahor kinur mutin metan oituan.

Balun mai ho la’o ain, balun ho motor no balun mós kareta hodi hananu, haklalak viva hodi halo movimentu transporte públiku no privadu sira kuaze paradu, tanba estrada no kampo Lautem ne’e sai mean tiha.

Maski loron manas, maibé militante no simpatizante la sente kolen no baruk, sira kontinua hola fali iha kampo ho entusiaizmu hodi hein no simu lider nasionál FRETILIN nian ne’ebé hato’o programa Governasaun FRETILIN nian ba Munisípiu Lautem ne’ebé sai hanesan bazae FRETILIN nian ida iha parte Leste, alénde Baucau no Viqueque.

Iha komísiu Sekretariu Jeral Partidu FRETILIN, Mari Alkatiri hatete, atu hahú prosesu dezenvolvimentu Lautem, mak sei lori osan pensaun besik liu ba ferik katuas sira, no sei aumenta pensaun 30 dollares amerikanu, ba ferik katuas sira, wainhira FRETILIN manan iha eleisaun antesipada iha loron 12 fulan Maiu hodi kaer VIII Governu.

“Ferik katuas sira simu osan pensaun 30 dollares fulan tolu dala ida,  maibé sira tenki la’o do’ok no hein loron rua tolu para simu osan ne’e. Ida ne’e buat ida ne’ebé ke tenki rezolve. Primeiru osan mak tenki ba besik sira, no la bele husik sira atu la’o kilometru do’ok foin atu simu osan,” hateten FRETILIN Marí Alkatiri ba militante no simpatizante sira no simu ho basa liman, hakfuik no viva.

Lider másimu partidu istóriku ne’e afirma, ho dezenvolvimentu agora hahú, nia fiar katak pensaun 30 dóllares ne’e sei bele aumenta, ne’ebé la presiza hein kleur, tamba ferik ho katuas presiza atu moris ho digñu no labele moris ho esmola.

Alkatiri hatutan, FRETILIN mak manan sei oferese mós osan bolsa da mãe ba inan kbi’it la’ek sira ne’ebé mak la iha kondisoens ne’ebé presiza ajuda.

“Entaun ita ajuda uluk, atu hamós ki’ak, entaun ita seidauk konsege hasai sira husi kiak no mukit, ita tenki kontinua apoiu ba sira, bolsa da mãe nu’udar obrigasaun estadu nian, haree inan ki’ak sira, nune’e sira bele haree fila fali sira nia oan, husi buat hirak ne’e, solusaun ida permanente lori dezenvolvimentu ba rai ida ne’e,” katak Alkatiri.

Iha kampaña jerál ne’e, Marí Alkatiri mós deklara, sei dezenvolve Munisípiu sai munísipiu ne’ebé baze ba ekonomia integrada tanba baze ba área agrikultura.

Alénde ne’e, Lautem mós iha fatin turíztiku tanba ne’e FRETILIN manan sei projeta fatin turístiku sira ne’e, hanesan Parke lider históriku Nino Konis Santana, atu dezenvolve sai fatin turíztiku ne’ebé bele atrai turista nasional no internasionál.

“Rai Lautem ne’e sai baze ida ba atividade ekonomia integrada, ne’ebé liga ba agrikultura, peska, indústria, no turízmu. Liga ba turízmu tamba saida? Tamba iha dezeñu históriku iha ne’e, Parke Nino Konis Santana iha Lautem, nu’udar parke ida ne’ebé ké bo’ot liu iha Timor Leste, no ita tenki halo protesaun ba parke ida ne’e,” dehan Marí Alkatiri no simu ho basa liman no viva husi masa kampaña.

Alkatiri fundamenta, sé halo parke ne’e, sai atraisaun ida ba turísta sira, turista Timor no turísta sira mai husi rai liur, no komprementalidade husi Munisípiu ida ba Munisipiu seluk para ke merkadu ne’e, bele la’o iha rai laran uluk.

“Saida mak ita iha, iha Lautem, bele fa’an ba Munisípiu seluk, tamba ne’e ho VIII Governu FRETILIN nian, atu loke Zonas Ekonomia Espesiais no Dezenvolvimentu Aseleradu. Signifika Munisípiu rua ka tolu sai zona ida, no Dezenvolvimentu Aseleradu ne’e, signifika halo dezenvolvimentu ne’e akontese lalais para povu bele hetan benefísiu,” Alkatiri deklara abertamente no militante, simpatizante sira rona ho entusiaizmu no ksoloka.oly


Banner

Foto

Notisia Ikus

PPN: Singapura rejeita TL adere ba ASEAN ne’e normál

August 5, 2021
Prezidenti Parlamentu Nasional (PPN) Aniceto Gut...

FRETILIN husu Governu hadi’ak implementasaun SB

August 5, 2021
Bankada FRETILIN, sujere Governu atu avalia impl...

Governu laiha kapasidade ezekuta OJE

August 5, 2021
Deputada bankada CNRT, Bendita Moniz Magno, kons...

Kevin Blackstone la kontente husik TL

August 5, 2021
Embaixadór Estadu Unidu Amérika (EUA), Kevin B...

Governu seidauk rekupera estragu sira husi DN

August 4, 2021
Parlamentu Nasionál (PN) kestiona, besik ona fu...
1 2 3 625

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker