GMN TV Politika Transporta material eleisaun ba Munisípiu, STAE preokupa ho estrada no eletrisidade

Transporta material eleisaun ba Munisípiu, STAE preokupa ho estrada no eletrisidade

1 views

Sekretáriadu Tékniku Administrasaun Eleitoral (STAE), preokupa maka’as kona ba estrada ba sentru votasaun sira iha teritóriu Timor Leste, tanba estrada ba sentru votasaun iha Suku balun kondisaun grave.

Diretur Jeral STAE, Acilino Manuel Branco informa, preokupasaun STAE nian la’os kona ba eletrisidade de’it, maibé preokpa mós ho eletrisidade ba sentru votasaun sira.

“Preokupasaun kona ba eletrisidade iha sentru votasaun sira, no asesu estrada ba sentru votasaun sira, entaun informasaun sira ne’e ita sei hato’o Ministériu Obras Públika atu bele halo intervensaun urjente, tanba lista ne’ebé uluk ita simu ona, ita hato’o hotu ona ba Obras Publika,” katak Acilino Manuel Branco ba GMN iha nia kna’ar fatin Caicoli Dili, Segunda (23/04).

Maibé Acilino Manuel Branco dehan, estrada ba Suku balun iha tinan kotuk hadia Ministériu Obras Públika hadia tiha ona, no balun dadaun ne’e iha hela konstrusaun.

“Dili hanesan konsentrasaun ne’ebé másimu tebes, ita husu nafatin apoiu Xefi Suku sira hotu atu bele tulun orgaun eleitoral sira atu bele apoiu prosesu transportasaun no material eleisaun, li-liu atu asegura prosesu kontazen votus iha sentru votasaun sira,” afirma nia.

Ho situasaun ne’e mak, STAE organiza enkontru ida ho lider komunitária sira iha teritóriu tomak, hodi haree kona ba situasaun sira ne’e hotu.

“Ita halo ona transportasaun non sesitivu sira ba Munisípiu iha semana kotuk, no tuir ita nia planu, sei transporta ikus iha loron 4 fulan Maiu. Atu transporta ba Munisípiu, ita halo hela koordenasaun ho ministériu relevante atu bele apoiu transporta material sira ne’e ba kada Munisípiu,” dehan Acilino.

Nia esplika, atu transporta material eleisaun ba kada Munisípiu ne’e, presiza transporte ho volume bo’ot, tanba material sira ne’e, tenki transporta to’o sentru votasaun 866, no 1.158 estasaun votus, entaun presiza viaturas barak.

Nia salienta, alende nivel Munisípiu, STAE mós koordena ho liñas sektoral sira ne’ebé mak eziste iha Munisípiu atu bele identifika viaturas Estadu nian iha kada Munisípiu, no aluga tan kareta 10 iha kada Munisípiu.

“Ita hato’o ona preokupasaun ida ne’e ba Ministériu ESTATAL, no ESTATAL halo ona koordenasaun ministériu no liña sentral sira iha nasional, liu husi Ministériu Finansa, no Diresaun Jeral Patrimoniu Estadu atu identifika viaturas Estadu hotu ne’ebé mak iha kondisaun disponivel hodi suporta atividades ne’e,” katak Acilino.

Nia esklarese, STAE presiza viaturas 360 resin atu bele transporta material eleisaun antesipada ne’e ba Munisípiu hotu. Maibé Acilino dehan, dadaun ne’e iha ona viaturas 200 resin mak preparadu ona.

Kona ba orsamentu atu transporta material eleisaun nian, Acilino dehan, Ministériu Finansa halo ona transferensia ba konta bankaria Administrasaun Munisípiu ida-ida ninian.

“Normalmente, osan ne’ebé mak preve, loron ida US$ 100 ba kada kareta, maibé ita sei halo tan negosiasaun ho sira,” katak Acilino.

Alende ne’e, Ministru ESTATAL, Valentim Ximenes hateten, hot-hotu tenki hola nia papel atu bele garante rezultadu eleisaun ne’ebé diak ba Estadu.

“Ha’u ko’alia mós ba STAE rasik, STAE la’os de’it mak halo prosesu ida bai-bain, halo de’it rejistu, maibé sira mós iha papel kona ba edukasaun ba votantes. Iha eleisaun liu ba, ita iha 11.000 votus nulus, sei agora mak aumenta fali ba 15.000 ba leten, edukasaun ba votantes failla, ne’e ha’u aviza kedas ona ba ha’u nia Diretur STAE, tanba ho ha’u laiha segredu, hot-hotu tenki servisu. Ha’u dehan ba CNE mós hanesan, ho Governu ida ne’e, ami entrega tomak fila fali ita bo’ot sira nia papel fundamental hanesan orgaun supervizaun, la’os ba tau matan de’it para kritika de’it, mas halo servisu ida naran edukasaun sívika,” dehan Valentim Ximenes.cos


Banner

Foto

Notisia Ikus

Prezidente EDTL.EP: La fasil rezolve eletrisidade lakan-mate

October 22, 2021
Prezidente Konsellu Administrasaun Eletrisidade ...

Ramos Horta: TL presiza ospitál modernu

October 22, 2021
Eis Prezidente Repúblika, José Ramos Horta, ha...

Ekipa haat husi MJ sei aranka ba rai-liur

October 22, 2021
Ministru Justisa (MJ), Manuel Carceres, informa,...

ONU sei fó asisténsia ba ElPrez no ElPar

October 21, 2021
Reprezentante Organizasaun Nasaun Unida (ONU) se...

Kalendáriu audiénsia OJE 2022, Komisaun C aprova ona

October 21, 2021
Prezidente Komisaun C, ne’ebé trata asuntu fi...
1 2 3 654

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker