Prezidente Rejiaun Administrativu Espesial Oecusse Ambeno (RAEOA) Marí Alkatiri, hateten, deklarasaun iha nia konta Facebook ne’ebé hatete, FRETILIN moris atu hasai povu husi nakukun, no AMP mosu lori nakukun ba povu, nia mak hakerek duni, tanba realidade to’o agora maske ukun aan tinan 10 resin ona, maibé povu sei kontinua halerik kona ba infraestrutura báziku.
“AMP ukun Tinan sanulu resin ona, maibé povu kontinua moris iha halerik nia laran, tanba bee moos laiha, eletresidade kontinua lakan mate, lixu kontinua naklekar iha fatin-fatin iha kapital Díli, halo povu kontinua preokupa ho dezenvolvimentu ne’ebé la’o iha ita-nia rai laran, liu-liu iha sidade Díli, tanba área insfraestrutura ne’ebé la’o la ho kordenadu, situasaun hirak ne’e bele prejudika povu nia moris lor-loron, tanba ne’e, presiza hadia kualidade servisu iha governasaun ne’e nia laran”,hateten Marí Alkatiri iha edifisiu ZEESM RAEOA, Tersa (09/04).
Sekretáriu Jeral FRETILIN ne’e esklarese, atu ukun ho di’ak, tenki haree intrese nasional, labele haree partidária, no laiha ema ida mak manda Estadu, tanba Estadu iha orgaun hat atu garantia ukun aan ne’e.
“Tanba iha ninia lei rasik, la’os ema ida nia intrese tau fali iha leten. Tanba ne’e husu ba jerasaun foun atu hanoin naruk, hodi dezenvolve rai Timor-Leste ba futuru ne’ebé mak di’ak”, afirma Marí Alkatiri.
Entretantu, antes ne’e membru Parlamentu Nasional, husi Bankada PLP, preokupa ho deklarasaun Prezidente RAEOA nian ne’ebé fó sai iha media social (Facebook), no konsidera deklarasaun Marí Alkatiri nian ne’e, hanesan retórika, tanba agora tempu atu hanoin dezenvolve nasaun, la’os halo deklarasaun retórika iha media sosial.aba
