Vise Xefi bankada CNRT, Deputadu Patrocino Fernandes, konsidera, Ministériu Públiku (MP), laiha seriedade iha atendimentu kazu iregularidade ne’ebé autoridade Zona Ekonómia Espesial Merkadu (ZEESM) iha, bazeia ba relatóriu Câmara de Contas fó sai.
“Bankada CNRT haree katak, Ministériu Públiku loloos tenki haree ona no tau matan ho seriedade ba relatóriu Câmara de Contas ne’ebé públiku hotu hatene, tanba tribunal publika ona, atu bele haree ida ne’e, dever konstitusional ministériu públiku nian, konstituisaun fó dalan ba MP atu hala’o nia servisu, hodi defende interese Estadu nian. Bankada CNRT nia haree katak, ministériu públiku servisu neneik liu, ou rekursu mak lato’o ka, saida mak lato’o, ministériu públiku laiha seriedade atu haree asuntu ida relatóriu Câmara de Contas ne’ebé refere ba RAEOA-ZEESM”, hateten deputadu CNRT, Patrocino Fernandes ba jornalista iha sala bankada CNRT nian, Kuarta(10/04/2019).
Tuir deputadu AMP ne’e katak, tuir loloos ministériu públiku hola ona pasu hodi loke investigasaun, tanba iregularidade ne’ebé auditória tribunal kontas detekta iha prezuizu bo’ot ba Estadu.
“Ministériu públiku la tau atensaun ba relatóriu ida ne’e rasik, ne’ebé iha relatóriu ne’e hatudu katak, iha frazilidade sira ne’ebé mak kométe husi autoridade RAEOA ZEESM, ne’ebé lori prezuizu ba Estadu ne’e, pur volta miliaun USD 30, ne’e la’os osan oituan. Lolos Ministériu Públiku tenki hola ona pasu sira ne’ebé mak atu loke investigasaun hodi buka lolos verasidade husi relatóriu ida ne’e, rasik sai husi kâmara de kontas mak halo auditória”, katak deputadu CNRT ne’e.
Iha sorin seluk, Vise Xefi bankada FRETILIN, Francisco Branco hateten, órgaun ida-ida hala’o nia servisu tuir nia kompeténsia, tanba nasaun sira seluk avansadu mós sei iha frakeza instituisaun.
“Órgaun soberania sira buka atu hatun malu ne’e ladi’ak, órgaun soberania hotu iha nia frakeza, ida ne’e so bele hetan bainhira tempu naruk konstrusaun Estadu nian, tanba Estadu barak ne’ebé moris kleur mós, sei iha problema iha sira-nia instituisoens Estadu nian”, afirma Branco.
Antes ne’e, Tribunal konstas liu hosi auditória, detekta iregularidade iha ZEESM RAEOA kuaze miliaun USD30.say
