Orsamentu duodesimál ba fulan Abril tokon USD 114.887.000

Konsellu Ministru (KM), aprova tetu orsamentál duodesimu ba fulan abril, iha ambitu rejime duodesimál, ho montante tokon USD 114.887.000, nomos aprova projetu dekretu governu kona-ba alterasaun dahuluk ba dekretu governu númeru 1/2020 ezekusaun orsamentál rejime duodesimál tinan finanseira 2020.

Tuir komunikadu imprensa ne’ebé GMN asesu husi, Gabineti Ministru Estadu Prezidénsia Konsellu Ministru, Agio Pereira, Kuarta (01/04/2020), iha Centro Convenções Díli (CCD).

KM mos aprova projeitu deliberasaun governu ne’ebé aprezenta husi, Ministra Finansas Interina, Sara Lobo Brites.

Kona-ba deliberasaun ida ne’e preve despeza relasiona ho akuzasaun ba ai-moruk no ekipamentus, atu hatan ba COVID-19, pagamentu ba pensaun, pagamentu ba arendamentu, no ba instalasaun husi misaun diplomata sira.

No ida ne’e previstu mós iha deliberasaun, suspensaun no despeza, durante vijensia Estadu Emerjénsia, hodi bele halo redusaun, relasiona ho viajen estranjeiru, formasaun no seminariu, nomos manutensaun ba veikulu.

Alende ne’e, Konsellu Ministru mós aprova, dekretu governu ne’ebé aprezenta husi Ministra Finansas Interina, kona-ba alterasaun dahuluk ba dekretu governu, númeru 1/2020 loron 15 fulan janeiru, ezekusaun orsamentál iha rejime duodesimál iha tinan 2020 finanseiru nian.

Alterasaun ne’e atu fó dalan hodi realiza aktividade normal Estadu nian, no posibilidade ba ezekusaun husi despeza públika, to’o limite ne’ebé fixa iha Orsamentu Jerál Estadu uluk nian, no estabelese konjunta ida hodi salva no garante jestaun prudente ba dotasaun orsamentais.

Nune’e mós, Konsellu Ministru mós aprova alterasaun dahuluk, husi dekretu governu númeru 3/2019 loron 27 fulan Marsu, kona-ba ezekusaun husi Orsamentu Jerál Estadu ba tinan 2019.

Alterasaun ida ne’e atu fó dalan hodi realiza despeza ne’ebé iha relasaun ho prevensaun kombate COVID-19, ho urjénsia no lalais, hanesan despeza ne’ebé relasiona ho servisu aviasaun, no kontribuisaun husi organizasaun internasionais, antes verifika ba efeita prestasaun servisu ka entrega ba bens servisu.Cin