GMN TV Politika PD sujere PM komunika ho CNRT normaliza Governasaun

PD sujere PM komunika ho CNRT normaliza Governasaun

0 views

Sekretáriu Jerál Partidu Demokrátiku (PD), António da Conceição Kalohan, sujere Primeiru Ministru (PM), Taur Matan Ruak, komunika ho partidu CNRT ne’ebé lídera husi líder karismátiku, Kay Rala Xanana Gusmão, hodi normaliza governasaun, atu hakotu impase polítiku ne’ebé ladauk iha rohan no rezulta ekonomia no dezenvolvimentu la la’o.

Tanba ne’e, tuir Xefe bankada PD ne’e katak, PM la presiza bolu PD, maibe presiza bolu liu mak CNRT, tanba CNRT mak hola parte iha governasaun no koligasaun AMP tuan ne’e.

“Sira la presiza bolu tanba tinan ida ka rua nia laran ne’e ami fó tiha ona votu a favór, lalika hanoin to’o ba bolu, bainhira sira (VIII Governu) la’o normal hela, votu ne’e ami sei fó nafatin, maibe tanba hatene katak agora laiha ne’e mak iha mós liberdade ida hamosu koligasaun foun ne’e, ho intensaun ida atu normaliza governasaun. Kuandu governu planeia, governu tenke ko’alia mós ho CNRT, tanba governu ne’e Aliansa Mudansa ba Progresu (AMP) inklui mós  CNRT nian. Kecuali sira ko’alia kona-bá governu foun, maibe ko’alia kona-bá remodelasaun laiha influensia ida ho ami PD, ne’e signifika AMP ida uluk ne’e iha hela, tanba ne’e mak atu remodela, maibe atu remodela buat ne’ebé mak la’os ona hanesan ne’e ita main curang.”tenik António da Conceição Kalohan ba jornalista sira iha PN, Kuarta (29/04/2020).

Kalohan afirma, koligasaun foun ne’ebé nafatin lideradu husi CNRT, laiha hanoin atu halo mosaun sensura hasoru mandatu Primeiru Ministru Taur Matan Ruak, tanba VIII Governu nia orsamentu jerál rasik sumba tiha ona iha PN.

Tanba ne’e, tuir nia, loloos buka hanoin mak oinsa atu forma hikas governu foun ida, maibe envolve partidu polítiku hotu, nune’e, bele hakotu ona impasse polítiku ne’e.

“Ami laiha planu, tanba ba ami ka’er metin ba orsamentu ne’ebé la passa ne’e, se aprezenta tiha ona, maibe retira PR rasik aseita, faze polítiku mak ida ne’e, no mós laiha buat mak atu ba fali mosaun sensura, se orsamentu ne’e rasik mak lakon no laiha ona, tanba ne’e konstrutivu oituan, estadu hanesan ne’e hela, osan laiha, ita buka oinsa bele normaliza fila fali ambiente, maibe pedidu atu halo fatin mosaun sensura ka saída ne’e laiha. Ba ami remodelasaun ami la hanoin hetan ida, ami hanoin mak karik remodelasaun ne’e bele iha, kuandu governu ne’e normal hela, no hadi’ak sirania uma laran, se uma ne’e dehan naksobu, atu halo fali uma ida ne’ebé ita hotu-hotu mak sobu ne’e, uma ne’e na’in mak se fali. Ha’u la dehan laiha dalan, bele halo remodelasaun, maibe koligasaun tuan mak bolu ba, hadia fila fali, ne’e koligasaun ne’e automatikamente laiha tiha de’it, tanba partidu CNRT mós iha hela laran, buat ne’e uma laran ninian. Presiza mak sira (koligasaun AMP tuan) bele ko’alia ba malu, hodi normaliza fali situasaun ne’e,  ne’e mak di’ak liu, tanba ita halo remodelasaun atu halo saída, kecuali sira ko’alia kona-bá formasaun governu foun, ne’e mak hodi ko’alia katak oinsa ita atu harí hamutuk uma foun ida ne’e, no hakarak konstroi hanesan ne’e, ne’e kestaun komunikasaun de’it.”subliña líder PD ne’e.

Aleinde ne’e, xefe bankada PD mós argumenta, PD vota abstensaun no afavór ida de’it ba estensaun estadu emerjensia ne’e, tanba CNRT no KHUNTO rasik hola pozisaun ida-idak nian, la’os koligasaun nia andamentu polítika.

“Votu ne’ebé mak halai ketak ne’e loos duni, maibe ne’e mós la’os situasaun ida ne’ebé mak deside andamentu polítika, hanesan Orsamentu Jerál Estadu, programa governu nian, ne’e mak atu justifika katak laiha kekompakan ne’e la’e. Hanesan 2017 bainhira ami hamutuk hela ho FRETILIN no KHUNTO iha sétimu governu ninian, ami hatur tiha vise PN ida deputadu António Verdial husi KHUNTO, depois hases-an iha segundu dia, loloos ne’e, étikamente ne’e rezigna-an, tanba nia partidu sai hosi koligasaun, ida ne’e hahalok sira ne’ebé mak dignu, maibe agora oin seluk, tanba sira (KHUNTO) rasik seidauk  deklara atu sai nein PD ne’ebé mak ida vota a favór no abstensaun ne’e mós seidauk, ne’e instrumentu diplomasia ne’ebé mak PD halo, tanba PD hatene ona hanesan partidu, se atu tuir de’it saída, ami hotu-hotu vota afavór, maibe CNRT vota hanesan nia pozisaun partidu nian, vota duni kontra. Tanba ne’e PD haree ba pozisaun PD nian, maibe ida ne’e ladauk hatudu ba ami katak AMP foun ne’e rahun, laiha implikasaun, a não ser Dra. Armanda hakerek karta ida ba Prezidente koligasaun, Maun Boot Kay Rala Xanana Gusmão, hodi husu katak atu hases-an ona husi koligasaun ne’e, no kecuali prezidente PD, Assanami mak hakerek karta hodi husu hases-an ona hosi akordu ne’e loos, maibe  ho hahalok ema ida ni’an de’it, ou deputadu nian, ne’e la’e.”realsa António.

Polítiku ne’e akresenta, PD sempre fó apoiu ba governasaun da-ualu, liu hosi votu a favór ba programa no orsamentu, kompara ho partidu FRETILIN ne’ebé mak vota kontra ba buat hotu, maibe halo nia aan hanesan anju iha Parlamentu Nasionál.

“PD vota a favór nafatin, orsamentu mai mós vota afavór, programa mai vota afavór no lei ne’ebé mak sira altera mós ami afavór, seidauk vota kontra. Diferente ho ami nia maluk Fretilin sira, vota kontra buat hotu, depois derepente sai fali anju iha Parlamentu,”dehan deputadu PD ne’e.

Antes ne’e, sekretáriu jerál interinu partidu CNRT, Jacinto Rigoberto, deklara, koligasaun foun refere sei mantein sólidu, hodi hein desizaun husi xefe Estadu.Say


Banner

Foto

Notisia Ikus

PPN-Konselleiru KHUNTO deskute plataforma entendimentu OJE 2022

September 24, 2021
Konselleiru máximu Partidu KHUNTO, José dos Sa...

Posibilidade semana oin, Governu sei la estende tan SS iha Díli

September 24, 2021
Diretór Sala Situasaun Sentru Integradu Jestaun...

FRETILIN: Ema balu tenta destrói amizade Taur-Alkatiri iha MedSos

September 23, 2021
Xefe bankada FRETILIN, Francisco Miranda Branco,...

Governu propoin PR Lú Olo renova EE

September 23, 2021
Governu kontinua propoin, ba Prezidente Repúbli...

Governu hakotu SS iha munisípiu tolu, Díli mantein

September 23, 2021
Governu iha reuniaun Konsellu Ministru (KM), Kua...
1 2 3 643

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker