GMN TV Politika PN preokupa komunidade sira la obedese regra EE

PN preokupa komunidade sira la obedese regra EE

0 views

Parlamentu Nasionál (PN) preokupadu ho komunidade iha kapital Díli ne’ebé la obedese ona ba régra Estadu Emerjénsia (EE), iha ne’ebé halo movimentasaun maka’as iha fatin públiku sira.

Atu evita transmisaun Covid-19 ne’ebé hamate ona ema rihun atus rua iha Mundu no Timor-Leste mos iha ona kazu pozitivu nain ida nune’e Prezidente Republika dekreta kedas Estadu Emerjénsia iha loron rua nolu resin walu fulan Marsu tinan ne’e, maibe sidadaun balun kontinua la kumpri regra Estadu Emerjénsia nian.

Ho situasaun ne’e prezidente komisaun B-Parlamentu Nasionál ba asuntu seguransa no defeza  Deputadu Adérito Hugo da Costa, preokupadu tanba komunidade komesa halo movimentu makas no la uza maskra.

“Ita haree fo-foun implementa EE ne’e movimentu transporte iha Kapital Díli mamuk, laiha, tanba komunidade sira tauk maibe iha semana ida ne’e transporte públiku no privadu sira kontinua sirkula iha kapital Díli hanesan bai-bain tanba governu la sériu iha implementasaun régra ba EE ne’e”,hateten Aderito Hugo ba GMN iha PN Segunda (06/04).

Tuir Deputadu bankada CNRT ne’e katak, komunidade sira iha Munisípiu seluk kumpri duni ba EE ne’e tanba movimentu iha Estrada públiku ladun iha, komunidade sira hakmatek iha ida-idak nia uma. Maibe iha Kapital Díli mak komunidade sira hahú movimentu ba mai informa.

Hatán ba preokupasaun ne’e, Sekretáriu Estadu Komunikasaun Sosial, Mericio Juvinal Akara, informa, sei koordena ho Sentru Integradu Jestaun Krize hodi fó atensaun.

“Ba preokupasaun membru Parlamentu ne’e ami sei halo koordenasaun di'ak ho  ekipa Sentru Integradu Jestaun Krize atu oinsa bele kordena ho parte seguransa bele implementa regra EE ba komunidade sira ho rigór hodi evita transmisaun Covid -19 iha Timor-Leste”,katak Akara.

Prezidente Repúblika dekreta ona Estadu Emerjénsia durante fulan ida hahú loron rua nolu resin walu fulan Marsu to’o rua nolu resin neen fulan Abril, tinan ne’e, hodi prevene populasaun husi Covid -19, maibe sidadaun balun kontinua la kumpri regra sira durante EE.

Tuir observasaun jornalista GMN iha terenu hatudu katak, maske governu implementa EE hodi limita movimentu transporte públiku iha kapital Díli, maibe komunidade balun kontinua halo movimentu.

Komunidade sira la kumpri

Komunidade balun la kumpri desizaun Estadu Emerjénsia no dekretu lei númeru 3/2020 hodi kontinua halo movimentu la uza máskara, atu nune’e bele prevene COVID-19.

Tanba  ne’e  Unidade Polísia Marítima iha Segunda (06/04/20) kontinua halo auto stop ba kareta ho motorizada ne’ebé mak tula komunidade sirkula iha kapital Díli, maibé balun la uza máskara no distánsiamentu sosial.

Ho aktu sira ne’e, Polísia haruka ema sira tun haruka ba sosa fila-fali máskra hodi bele utuliza, hafoin sae fali sira nia transporte, wainhira máskra laiha, obrigado tenki  la’o ain.

Auto stop ne’e lidera husi Komandante Unidade Polísia Marítima, Superintendente Assistente Basílio de Jesus.

Basílio de Jesus esplika,  husu komunidade hotu ne’ebé mak halo movimentu ho transporte tenki uza máskra, atu nune’e bele prevene COVI-19.

 “Agora Polísia nafatin esplika hatoo ba ita nia komunidade sira hotu, liu-liu ba sira ne’ebé mak uza kareta  no motorizada, primeiru obriga sira tenki uza máskra, bas é de’it mak argumentu máskra laiha não, obriga nafatin ba sosa máskra uza, hanesan motorizada sira mai sira la uza máskra ita hapara tiha sira, motor para iha ne’e sira ba sosa tiha maskra mai tiha foin fó sira nia motor. Ha’u hanoin  ida la’os buat todan ida ita atu hala’o, primeiru ita fó para nia asegura nia a’an rasik segundu asegura mós ema ne’ebé mak nia atu hasoru ba tanba ne’e mak Polísia mak obriga ema, maibé lei mak obriga ema atu hakruk ba lei, entaun ita resepita malu, Polísia hala’o lei no ordem  iha terenu ita halo auto stop  atu haree sé mak uza máskra, sé mak lauza”,esplika Komandante Unidade Polísia Marítima, Superintendente Assistente Basílio de Jesus, ba  jornalista sira Segunda (06/04/20), iha área Palásiu Governu.

Relasiona ona COVID-19 ne’ebé mak hamate ona ema iha mundu no iha Timor-Leste positivu ema na’in ida.

Tan ne’e Prezidente Repúblika deklara Estadu  emerjénsia iha loron 28 fulan Marsu tinan ne’e komunidade hotu kumpri, maibé liu tiha loron tolu ho balun movimentu capital Díli laran komesa aumenta. Tanba ne’e PNTL nafatin sosializa dekretu lei númeru 3/2020 atu nune’e komunidade bele prevene a’an husi COVID-19.aba/avi

 


Banner

Foto

Notisia Ikus

Arsénio Bano agradese ba PM

August 3, 2021
Hafoin kompleta mandatu tinan ida, Prezidente Au...

TNI tiru kanek Timor-oan ida, PN husu TL rezolve ho RI

August 3, 2021
Parlamentu Nasionál liuhosi komisaun A, ne’eb...

Governu tenke investiga, implementasaun subsídiu ba universidade

August 3, 2021
Parlamentu Nasionál (PN), liuhosi komisaun G ne...

Semana ne’e MAKLN hahú verifika dadus veteranu

August 1, 2021
Ministériu Asuntu Kombatente Libertasaun Nasi...

PM Taur hirus membru PSHT re'in ema nia ain

August 1, 2021
Primeiru Ministru (PM), Taur Matan Ruak, desdkor...
1 2 3 624

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker