Kandidatu Prezidente (KaPrez) Repúblika (PR), José Ramos Horta, hateten, nia sei koalia ho Governu atu harii merkadu ne’ebé kualidade, bainhira povu fó votu konfiansa hodi sai Xefe Estadu.
Lia hirak ne’e hato’o husi kandidatu Prezidente Repúblika ho númeru sorteiu 1, José Ramos Horta, bainhira hala’o atividade kampaña door to door no fahe brosusa ba komunidade iha merkadu Manleuna, Díli, Kuarta (6/4/2022).
“La’ós merkadu ida ne’e de’it, tenke haree merkadu iha Timor-Leste tomak. Ita haree iha Maubisse nian, kuitadu ema fa’an iha luron, udan tau, atividade barak iha Maubisse nian ne’ebá tenke buka fatin dignidade ba negosiante sira ho komportu. Ne’e ha’u promete tenta halo ba oin, klaru sei hamutuk ho Governu, hamutuk ho Parlamentu, ha’u mós sei buka governu estranjeiru ruma para sira oferese, oferese halo merkadu sira ne’e, harii merkadu simples maibé kualidade no fatin armajen rai sasán”,esplika Kandidatu Prezidente Repúblika (PR) José Ramos Horta, ba jornalista sira hafoin hala’o atividade kampaña door to door iha merkadu Manleuana.
Hafoin door to door iha merkadu Manleuana kandidatu Prezidente Repúblika, José Ramos Horta, kontinua hala’o atividade door to door, iha Aldeia Turleu, Suku Tibar, Postu Administrátivu Bazartete, Munisípiu Liquiça.
Atividade door to door hetan observasaun husi CNE, observadór internasionál no hetan seguransa husi PNTL.avi
