Reprezentante povu iha uma fukun Parlamentu Nasional (PN), deputadu António Verdial, husu Governu, atu halo intervensaun ba folin sasán liuhosi hola medida ruma, hodi responde ba situasaun atúal, tanba folin sasán iha merkadu sa’e maka’as, liu-liu kombustível no Bimoli ho sasán nesesidade bázika sira seluk.
Deputadu ne’e afirma, sasán folin dadaun ne’e sa’e maka’as liu kompara ho antes ne’e.
“Hanesan reprezentante povu iha uma fukun ida ne’e, sentre triste tebes, simu halerik barak hosi povu, kona-bá folin sasán ne’ebé kontinua aumenta, ita haree agora ne’e Bahasa karik dehan tiga ka lipat, tanba ne’e husu ho respeitu ba ezekutivu sira, atu tau matan ba asuntu ida ne’e.”afirma deputadu António Verdial liuhosi nia intervensaun iha plenária , Segunda (04/04/2022).
Folin sasán nesesidade báziku sae hahú iha fulan Janeiru to’o fulan Marsu ne’e, husi 20% to’o 50% liu, tanba ho sasán folin ne’ebé sa’e, la’os de’it iha Timor-Leste, maibe mai kedas husi nasaun importadór.
Enkuantu Timor-Leste nu’udar nasaun ida ne’ebé sei dependénsia maka’as ba sasán importasaun.
Mina Bimoli litru 5 ne’ebé antes ne’e ho folin US$ 5, dadaun ne’e folin sa’e hosi dollar US$ 7 to’o to’o US$ 10.
Mina litru 2 antes ne’e folin US$ 2 to’o US$ 3, maibe dadaun ne’e folin sa’e hosi US$ 4 to’o US$ 5.
Alende mina sona, manu-tolun mós sai preokupasaun komsumidór sira, tanba folin hahú sa’e maka’as iha merkadu.Say
