GMN TV Politika AMP sei harii bankada ketak-ketak iha PN ■CNRT menus kadeira ida

AMP sei harii bankada ketak-ketak iha PN ■CNRT menus kadeira ida

0 views

Prezidente komisaun jurisdisaun AMP, Arão Noe Amaral, deklara, Bloku koligasaun Aliansa Mudansa ba Progresu (AMP) ne’ebé kompostu husi partidu CNRT, PLP no KHUNTO, sei la’o ho bankada ketak-ketak iha Parlamentu Nasionál (PN) ba mandatu lejislatura dalima nian, hodi nune’e bele mantein prezensa partidu ida-idak nian.

Kuadrus AMP ne’e relata tan, maske sei hamri’ik ho bankada ketak, maibe AMP sei mantein ho konjuntura polítika iha Parlamentu Nasionál (PN) durante tinan 5.

“Tuir ami nia akoordu bankada 3 ne’e, partidu 3 ne’e ba iha Parlamentu sei hari’i bankada ketak-ketak nafatin, ida ne’e mak definidu ona ami nia akoordu, depois de eleisaun,”haktuir Prezidente komisaun jurisdisaun AMP, Arão Noe Amaral ba jornalista sira iha sede nasionál AMP Bairro Grilhos, Segunda (28/05/2018).

Polítiku nain ne’e afirma, estabelesimentu kadeira deputadu AMP nian, sei tuir númeru deputadu iha IV lejislatura kada bankada, PLP kadeira 8, KHUNTO 5 no CNRT mak menus ida, hela 21 avansa ba V lejislatura.

“Subtituisaun ba deputadu sira, karik kandidatu husi PLP nian, PLP rasik mak sei mai troka, se husi CNRT nian, CNRT mak troka, no KHUNTO nian, nia ema rasik mak sei troka, ami mak menus duni kadeira 1, maibe ba ami laiha problema, importante mak bele atinji ami-nia objetivu fundamental AMP nian, hametin Estadu no defende riku soin Timor-Leste nian,”dehan Noe.

Tuir Arão Noe, koligasaun antes eleisaun, maibe hamriik bankada ketak iha PN, sei la viola lei ka regras ruma, tanba akordu polítika formal entre partidu 3 nian, hodi regula asaun atividades koligasaun nian to’o atinji nia mandatu V lejislatura remata.

“Ami intende malu ona, tanba ne’e akordu formal ida, momentu ba rejistu iha CNE no Tribunal, hanesan akordu formal ida atu regula asaun atividades koligasaun nian, to’o mandatu V lejislatura,”katak Arão.

Atual deputadu IV lejislatura ne’e garante, sei la mosu konflitu ba konjuntura polítka entre partidu tolu ne’ebé inklina koligasaun AMP, durante mandatu lejislatura dalima, tanba intende malu entre estrutura no militantes di’ak nanis, dezde fulan walu ba kotuk antes tama eleisaun antesipada.

Lakohi tan fahe kadeira ho ParPol seluk

Nune’e mos Koligasaun partidária Aliansa Mudansa ba Progresu (AMP), lakohi halo ona koligasaun ho partidu seluk hodi fahe tan kadeira, tanba partidu tolu iha AMP ne’e halo ona koligasaun antes no mesak ema kualifikadu atu bele lori Governu ne’e ba oin.

Lideransa AMP, Arão Noe, hateten, depois apuramentu final kona ba rezultadu Eleisaun Antesipada (EA) iha CNE, AMP halo ona konferensia ida hodi hateten katak, AMP sei ukun mesak.

“Iha ne’eba maun bo’ot Kay Rala Xanana Gusmão, portavos AMP, maun Taur Matan Ruak deklara ona katak, AMP sei la halo ona koligasaun, tanba ami koliga tiha ona, se ita koliga tan fali, ita aumenta de’it fahe kadeira,” katak Arão Noe ba jornalista sira iha PN horiseik.

Nia haktuir, partidu tolu ne’ebé forma AMP ne’e, iha tiha ona kompromisu polítika ida ho objetivu ida klaru.

Arão Noe esklarese, kuandu AMP koliga tan ho partidu seluk tan, entaun bele hamosu des-intendimentu no bele estraga tiha objetivu ne’ebé mak AMP trasa tiha ona.

“Ami AMP la’os dehan lakohi, maibé ami-nia konsistensia polítika atu bele atinji ami-nia objetivu, entaun ho maioria kualifikada ne’ebé ami hetan ona, ami prontu atu bele asegura Governu ne’e to’o 2023,” relata Arão.

Kona-ba estrutura VIII Governu, Arão Noe, dehan, AMP seidauk bele ko’alia sai ba públiku, tanba, Tribunal Rekursu foin mak anunsia rezultadu final eleisaun nian.

“Ami sei anunsia uluk mak kompozisaun meja ba Parlamentu Nasional, ami sei la ko’alia uluk estrutura VIII Governu. Kompozisaun meja Parlamentu kompletu ona mak foin ko’alia kona ba, se mak atu ba Primeiru Ministru, hotu tiha mak foin ko’alia kona ba membru Governu, hotu tiha mak foin ita ko’alia fali kona ba aprezentasaun programa, lei organika Governu  inklui Orsamentu Jeral Estadu 2018,” katak Arão.say/cos


Banner

Foto

Notisia Ikus

UDT apoia dada bee-moos ba komunidade iha Vatu-Vou

October 26, 2021
Partidu Uniaun Demokrátiku Timor (UDT), apoiu f...

KSDS-KE rekomenda PR haruka pedidu estensaun EE ba PN

October 26, 2021
Xefe Casa Civíl Prezidénsia Repúblika, Franci...

Kandidatu ajente administrasaun 93 “kesar” MEJD ba PN

October 26, 2021
Kandidatu Ajente Administrasaun (AA) 93 ne’eb...

CNRT “deteta” artigu balu iha LEO inkonstitusionál

October 26, 2021
Deputada bankada CNRT, Fernanda Lay, deteta, pro...

JFP-ADDD: Jornada polítika iha TL la tuir K-RDTL

October 25, 2021
Movimentu Junta Forsa Polítika Aliadu Defende D...
1 2 3 655

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker