GMN TV Diarío Akademista TL apoia Governu empresta osan investe ba GS

Akademista TL apoia Governu empresta osan investe ba GS

0 views

Akademista Timor-oan sira, fó apoiu másimu ba planu polítika VIII Governu konstitusional nian, ne’ebé atu impresta osan husi nasaun seluk, hodi investe ba kampu Greater Sunrise (GS) iha Be-asu Vikeke.

“Ita faze investimentu iha Be-Asu ne’e importante tebes, tanba ne’e empréstimu osan ne’e presiza duni, tanba ita-nia fatór dezenvolvimentu ne’e tolu, Governu, empreza no komunidade, sei dehan katak, Governu planu atu empresta osan, hodi dezenvolve infra-estrutura iha Be-Asu, ne’e komunidade mak sei hetan benefísiu, liu-liu Vikeke oan rasik, mak sei muda sira-nia vida ekonómia, entaun ita ko’alia kona-ba ben estar  ne’e akontese iha ne’eba, tanba ema barak mak ba investe iha ne’eba signifika rai sei folin, ema presiza hotel, presiza han hemu, presiza hahán. Ne’eduni ita-nia komunidade sira sei bele hakiak ona animal, hanesan karau sira ne’e, tanba iha prosesu investimentu, ema presiza han lor-loron, presiza hela fatin, ne’e oportunidade ba ita-nia povu sira, liu-liu sira Vikeke oan sira rasik. Tanba ne’e, labele haree de’it ba empreza sira,  tanba empreza mai investe otomatis hetan lukru, atu osan ne’e mai labele naben de’it, entaun presiza kooperasaun entre Governu ho empreza, tanba empreza mak loke servisu, Governu halo de’it desizoens polítika, situasoens sira ne’e mak redus mós númeru dezempregu,” hateten akademista Hugo Lorenço ba jornalista iha Hotel JL-Villa foin lalais ne’e.

Dekanu Universidade Díli (UNDIL) ne’e konsidera, empréstimu ne’ebé Governu sei halo laiha impaktu ruma, tanba bazeia ba kontratu,

maibé fatór importante liu ba Timor-Leste agora dadaun ne’e mak, prepara rekursu, nune’e ba futuru tinan 10 mai bele jere rasik nia riku soin refere.

“Ita presiza prepara ita-nia rekursu liu husi edukasaun, atu nune’e iha futuru mai ita bele jere rasik ona buat sira ne’ebé hahú estabele ne’e, Importante agora mak tenki prepara rekursu, para tinan 10 ka 15 mai ne’e ita tenki kaer rasik. Impaktu negativu laiha, tanba empréstimu ne’e mai tuir kontratu  ne’ebé mak Governu halo ona, to’o bainhira empreza nia osan kuandu fila, ita mak sei jere rasik, tanba laiha nasaun ida mak hakarak dezenvolve nia nasaun, sen halo impréstimu ne’e laiha, ita garante, tanba ho ita-nia osan mina, maibé ita mós tenki buka meius oinsa mak ita tenki hasa’e mós setór sira seluk, iha setór agrikultura, turizmu, ho setór sira seluk tan, labele abandona, ita labele depende de’it ba osan ne’ebé mai husi fundu mina rai, ho esplorasaun ne’ebé la’o dadaun, ema barak mai sei mai ita nia rain, tanba ita Timor ne’e importante tebes iha sudeste aziátiku, no importante mós ba mundu internasional, tanba mina ne’e sai rekursu importante ida ba atividade produsaun, liu-liu hanesan iha Xina, Amérika no seluk tan, tanba ne’e ita Timor oan tenki aproveita oportunidade ida ne’e,” tenik Lorenço.

Iha sorin seluk, Xefi bankada Opozisaun PD, António da Conçeição apoia polítika Governu nian atu deve osan husi nasaun seluk hodi investe iha GS, tanba empréstimu ne’ebé Governu halo atu investe ba futuru, la’o ba programa sosial sira.

“ Empréstimu ne’ebé halo, buat ne’ebé mak ita tenki halo diferensa ida, empréstimu ida ba área sosiais, empréstimu ida atu lori mai selu pensaun veteranus, idozus ne’e, labele, maibé empréstimu ida atu halo investimentu ne’e, hodi jere fila-fali reseitas ba vida ekonómia nasaun nian, hanesan deputadu, maske husi opozisaun, maibé hatene katak, ida ne’e konstroe ekonómia nasaun nian ba futuru, sei fó apoiu tomak. Desde uluk, ida ne’e mak PD mós subskrebe ba alterasaun lei revizaun lei atividades petrolíferas, ha’u hanesan primeiru defensor atu defende lei ne’e iha PN, tanba tempu ona, ita atu kuda ita-nia osan, ita labele dehan katak, osan ida ita rai hela ne’e mak osan ba jerasaun foun, osan ne’e nia valor ne’e sei tun, millaun ida agora, lahanesan ho millaun ida ne’ebé mak sei mai iha tinan 10 ou 15 mai, nia valor ne’e sei tun fila-fali. Tanba ne’e, di’ak liu investe osan ne’e agora, para bele jere fila fali reseitas, para osan ne’e ba aban bainrua nian, no garante valor ida aban bainrua nian”, relata Deputadu PD ne’e.

António da Conçeição sujere, atu Governu investe maka’as mós iha sétor turizmu industria no seluk tan,  nune’e labele garante de’it ba mina, tanba Timor-Leste riku tebes ho fatin turizmu, mármore no seluktan.

“ Agora dadaun ne’e, ita presiza liu mak setór industria ne’ebé mak ita presiza, alende petrolíferas, ita tenki haree ona industria ida ne’ebé mak ligadu rekursu sira seluk hanesan, fatuk, semente ne’ebé mak ita atu dezenvolve, mármore sira ne’ebé sei iha dadaun ne’e, buat ne’ebé mak ita bele dehan ita iha rikusoin potensial hela, maibé molok atu buat hirak ne’e, ita presiza mak rekursu humanu, para nune’e bele kaer rasik, selae ita dehan kaer rasik kuda talin ne’e la’e, maibé ita mak dada fali kuda no ema seluk mak sa’e fali kuda ne’e. Tanba ne’e agora dadaun ne’e, ita presiza investe iha rekursu humanu ne’e, depois bele halo esplorasaun, tuir mai setór turizmu ne’e importante tebes ba ita, no potensialidade kuaze rai Timor laran tomak iha potensial atu dezenvolve, maibé kestaun mak rekursu humanu hotu, tanba ita ba pouzada oan sira ne’e de’it mak ita-nia maluk sira atendimentu ne’e oin buis hela de’it, turista la ba toba ida. Ramelau mós fatin ida ne’ebé atrativu, maibé infraestrutura ne’e presiza atu hadia, sei la dada ema barak kuandu infraestrutura ne’e ladun di’ak, tanba ezemplu hanesan Ramelau, ema ba para atu haree loron matan sa’e ka beleza Timor laran nia husi Ramelau nia tutun ne’e, ema tenki sakrifika na dólar sa’e oras rua tolu iha nakukun ne’e, ema la haree buat ida, maibé ida ne’e so ema iha fiar de’it mak ba vízita Nai-Feto, maibé atraisaun turizmu nian ne’e presiza hadia infraestrutura. Signifika iha Ramelau hun ne’e presiza loke hospitalidade, no hahú loke estrada ruma ne’ebé halo parazen ba to’o leten para ema bele fasil haree beleza Timor nian”, relata António.

Antes ne’e, Primeiru Ministru Taur Matan Ruak deklara, VIII Governu konstitusional sei la foti osan husi fundu petrolíferu nian, maibé sei halo de’it empréstimu osan husi nasaun seluk, hodi investe iha kampu greater sunrise.say


Banner

Foto

Notisia Ikus

JFP-ADDD: Jornada polítika iha TL la tuir K-RDTL

October 25, 2021
Movimentu Junta Forsa Polítika Aliadu Defende D...

PR Lú Olo: Mane lebele marjinaliza feto

October 25, 2021
Xefe Casa Civíl Prezidénsia Repúblika, Franci...

Prezidente EDTL.EP: La fasil rezolve eletrisidade lakan-mate

October 22, 2021
Prezidente Konsellu Administrasaun Eletrisidade ...

Ramos Horta: TL presiza ospitál modernu

October 22, 2021
Eis Prezidente Repúblika, José Ramos Horta, ha...

Ekipa haat husi MJ sei aranka ba rai-liur

October 22, 2021
Ministru Justisa (MJ), Manuel Carceres, informa,...
1 2 3 654

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker