Sekretáriu Jerál Partidu FRETILIN atual Prezidente Autoridade RAEOA-ZEESM, Mari Alkatiri, la konkorda Timor-Leste (TL) nia partisipasaun iha kampu Greater Sunrise (GS) ho maioritária, tanba sei lori risku bo'ot ba Timor-Leste.
Sekretáriu Jeral Partidu FRETILIN atual Prezidente Autoridade Rejiaun Administrativa Espesiál Oecusse Ambeno no Zona Espesiál Ekonomia Sosiál Merkadu (RAEOA-ZEESM), Marí Alkatiri hato’o deklarasaun ne’e hafoin halo abertura ba aprezentasaun orsamentu bazeia ba programa preparasaun planu anual 2020 mak hala’o iha Palaban Oe-cusse foin lalais.
"Labele emosi demais ho buat sira ne'e, ha’u husu ba povu tomak para labele emosi demais mos, ita nia obrigasaun akompaña ho sentidu krítiku, saida mak lós ita apoia, saida mak lalós ita la apoia, e tenke krítika. Konaba sosa partisispasaun ne'e, ha’u la konkorda ita sai fali maioritáriu, ne'e tanba risku ita nian hotu, se sosa mak 30 pursentu ne'e ha’u konkorda, atu obriga konsorsiu ne'e mak atu asume risku ne'e hotu, e agora buat ne'e los ita manan barak, se ita sala risku ne'e ita nian hotu", hateten Alkatiri.
Tanba ne'e Mari Alkatiri husu ba entidade relevante sira no povu tomak labele emosaun demais, maibé tenke konta didi’ak no akompaña prosesu ne'e ho sentidu krítiku nune'e labele sala iha loron ikus.
"Ita koalia kona-ba saham ka asoens, ne'e la'os !; Ne'e sosa partisipasoens inklui besi tua sira iha tasi laran ne'e, e ne'e ita sosa dadauk ne'e. Segundu, ne'e ita foin komesa deit, agora ita presija 12 to'o 18 billioens de dolares para atu konklui, e ne'e la'os osan oituan. Ha’u fiar katak iha ema barak atu fó imprestimu (tusan), ha’u fiar !; mais ha’u nia apelu mak ne'e, halo konta didiak ba, se lahalo konta didiak mak sala, aban bainrua labele fó sala ba ema seluk, porque ha’u kuandu sala ha’u asume," hateten Sekretáriu Jeral Partidu FRETILIN, Mari Alkatiri.
Enkuantu iha loron 16 fulan Abril tinan 2019 ne'e Timor-Leste konklui ona millaun 650 dolares ba kompañia ConocoPhilips ho Shell ne'ebé asina husi Reprezentante Espesial Governu Timor-Leste ba asuntu petróleu, Kay Rala Xanana Gusmão iha Singapura.
