GMN TV Politika Bankada AMP apoia Xanana ho Timor GAP kontinua luta dada kadoras mai Timor

Bankada AMP apoia Xanana ho Timor GAP kontinua luta dada kadoras mai Timor

0 views

Bankada Aliansa Mudansa ba Progresu (AMP) fó apoia máximu ba reprezentante espesiál governu Timor-Leste (TL) ba  asuntu petróleu, Kay Rala Xanana Gusmão ho ekipa Timor Gas And Petroleum (GAP) atu nafatin luta dada kadoras Greater Sunrise mai Timor-Leste. 

Bankada AMP hato’o kestaun ne'e liu husi  konferensia imprensa iha Salaun Bankada CNRT iha Parlamentu Nasionál, Kuarta (15/05/2019).

Porta voz Maria Teresinha Viegas,  konsidera ho sosa asaun ne'e hanesan lori vantajen ba Timor-Leste atu dada kadoras mai Timor.

Maria Teresinha mos afirma, AMP kontinua fó nia apoiu ba Kay Rala Xanana Gusmão ho ekipa tomak atu aselera dezenvolvimentu projetu tasi mane nune'e bele dada ona kadoras mai Timor-Leste.

"Loron hirak ne'e bankada Fretilin iha ninia deklarasaun polítika afirma hikas sira nian posisaun klaru hodi impede prosesu negosiasaun ne'ebé lidera husi reprezentante espesial governu Timor-Leste ba asuntu petróleu, Kay Rala Xanana Gusmão, para viabiliza finansiamentu projetu Tasi Mane hodi prepara kondisaun para bele lori kadoras Greater Sunrise mai iha Beaço Viqueque", hateten Porta Voz AMP, Maria Teresinha Viegas.

Porta voz AMP ne’e haktuir, AMP nafatin fo konfiansa no fo apoiu tomak ba Kay Rala Xanana Gusmão ho nia ekipa atu bele atinji mehi dada kadoras mai TL.

"Sira ne'ebe mak lafiar, husik deit ba sira ne'ebe duvida hela, husik sira hela deit ho duvida. Ba AMP fo nafatin konfiansa no apoiu tomak ba Kay Rala Xanana Gusmão ho nia ekipa, no Timor Gap atu kontinua luta ba oin hodi atinji mehi, liberta tiha ona patria, mai liberta tan povu husi kiak, dala ida mak liu husi dada kadoras mai Beaço Viqueque," hateten porta voz AMP, Maria Teresinha Viegas.

Alende ne’e deklarasaun hirak ne'e atu hatán ba preokupasaun bankada FRETILIN ne’ebe durante ne’e preokupa  konaba aktividade preparasaun ba exsplorasaun kampu greater sunrise no tasi mane ne'ebe lidera husi Timor GAP, mak bankada AMP hakarak esklarese katak, depois de promulgasaun Lei das Atividades Petrolíferas, oposisaun halo tentativas oin-oin atu hapara Lei ida ne’e, maibé Tribunal Rekursu deside no firme hodi mantein ninia desizaun katak laiha inkonstitusionalidade ruma ba revizaun lei ida ne’e; Ministério Finanças ho Banco Central de Timor Leste hanesan jestor ba Fundo Petrolífero deside atu implementa lei ne’e. Iha implementasaun, Banco Central deside transfere osan hosi Fundo Petrolifero, maibé bele fó deit hanesan emprestimo ba TIMOR GAP ho osan total $650 milhões ne’ebé sei fó fila ho juros 5% tuir akordu; TIMOR GAP selu ona asõens Conoco Phillips no Shell Energy iha fulan-abril 2019 liubá, signifika katak Timor-Leste nia partisipasaun majoritária ba asõens 56,56% iha mina matan Greater Sunrise; Governo fó ona responsabilidade tomak ba TIMOR GAP E.P. atu halo jestão ba atividades exploração kampu Greater Sunrise; TIMOR GAP núdar Empresa Públika, kompañia estatal ne’e simu fiar ne’ebé VIII Governo fó atu halo meius hotu-hotu ne’ebé iha relasaun ho dada kadoras GS mai iha Beaço, Viqueque; Hodi kumpre mandatu ne’e, TIMOR GAP iha responsabilidade atu uza meius ne’ebé nia hatene katak diak no viável atu halo servisu tuir Plano, Programa no Calendário ne’ebé deside tiha ona; Desizaun hola ona, no laiha fatin atu rona ema ka grupu ida nia halerik ka preokupasaun ho intensaun hodi hapara atividades ne’ebé define ona tuir planu Governo nian; Estratejia saida deit mak TIMOR GAP halo atu hahú dada kadoras presiza hotu-hotu nia apoiu, tanba tuir AMP nia hanoin sei fó benefísiu bót ba Timor oan tomak.

Bankada AMP mos hatutan, tuir planu iha tinan 2025/2026 Greater Sunrise sei halo ona produsaun, sé hahú produsaun mak sei hatama reseitas nune’e TIMOR GAP iha kbiit atu selu hikas imprestimo ne’ebé hetan husi Banco Central Timor-Leste, no hare’e mós ba preokupasaun Prezidente República no exigência barak mai hosi Bankada Fretilin atu labele uza osan hosi Fundo Petrolífera, hakarak ka lakohi, TIMOR GAP tenki buka parseiro hodi investe iha atividades petrolíferas ne’ebé tuir planu hahú iha tinan 2019.

Tanba ne’e, bankada AMP haree katak, esforsu bót ekipa TIMOR GAP ne’ebé lidera hosi Maun Bót Kay Rala Xanana Gusmão halo duni, no ikus mai, bele hetan ona parseiru ida ne’ebé oferese án atu hari’I Porto ida iha Beaço. Projetu construção porto ne’e, tuir estudos ne’ebé TIMOR GAP halo ona ho Empresa Britânica ida hamosu estimasaun kustu $1,4 billiões dolares americanos. Emprestimo ne’ebé hetan hosi acordo commercial ho China Civil Engineering Construction Corporation (CCECC) hamutuk $940 milhões ne’ebé sei reembolsa bainhira TIMOR GAP hetan ona osan hosi explorasaun Greater Sunrise.

Deputados AMP fó apoiu tomak ba TIMOR GAP atu foti desizões estratégicas ne’ebé bele lori vantagem no benefícios mai Timor-Leste.

AMP komprende didiak katak, Akordu Komersial entre TIMOR GAP ho China Civil Engineering Construction Corporation (CCECC) núdar akordu kontinuasaun ne’ebé Governo halo ona Memorando de Entendimento (MoU) iha tinan 2017. Akordu hirak ne’e hanesan meius ida atu bele buka Parseiru no Finasiamentu ba Projetu Tasi Mane, tanba Woodside dehan ona katak sira sei la investe iha Beaço, Viqueque.

Além de ne’e, esforsu TIMOR GAP ba Akordu Komersial ne’e la uja Osan Estadu nian, tanba Governo evita uza Osan Fundo Petrolífero atu selu kontratu ida nee, maibé investimentu hosi China no sei selu liuhosi rendimentu produsaun husi Projetu Greater Sunrise rasik.

AMP preokupa tebes ho osan iha fundo petrolífero ne’ebé tun ba beibaik, ho despeza Estadu $1,500 milhões de dolares tinan-tinan, tinan 10 mai osan iha fundo petrolífero bele hotu. Sé Fundo Petrolífero hotu, Timor-Leste atu moris ho orsamentu hosi ne’ebé, sé reseitas domesticas deit la to’o $200 milhões labele sustenta Estadu ninia moris. Tanba-ne’e, AMP apoia total esforsu VIII Governo, TIMOR GAP hodi dezenvolve mina matan ka posu Greater Sunrise hodi hatama osan ba fundu petrolífero iha tempu badak, nune’e bele iha sustentabilidade dezenvolvimentu ekonomiku no finanseiru ba longo prazu. Ito

 


Banner

Foto

Notisia Ikus

Prezidente EDTL.EP: La fasil rezolve eletrisidade lakan-mate

October 22, 2021
Prezidente Konsellu Administrasaun Eletrisidade ...

Ramos Horta: TL presiza ospitál modernu

October 22, 2021
Eis Prezidente Repúblika, José Ramos Horta, ha...

Ekipa haat husi MJ sei aranka ba rai-liur

October 22, 2021
Ministru Justisa (MJ), Manuel Carceres, informa,...

ONU sei fó asisténsia ba ElPrez no ElPar

October 21, 2021
Reprezentante Organizasaun Nasaun Unida (ONU) se...

Kalendáriu audiénsia OJE 2022, Komisaun C aprova ona

October 21, 2021
Prezidente Komisaun C, ne’ebé trata asuntu fi...
1 2 3 654

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker