GMN TV Politika Jurista: VIII Governu labele to’o 2023 tanba problema ■Laiha dalan submete fali OJE ba PN

Jurista: VIII Governu labele to’o 2023 tanba problema ■Laiha dalan submete fali OJE ba PN

0 views

Jurista Timor-oan Amu Júlio Crispim, hatete, VIII Governu laiha baze jurídika atu kontinua nia funsaun, no VIII Governu atu la’o to’o 2023 ne’e problema bo’ot.

“Problema ne’ebé VIII Governu ne’e iha mak primeiru membru Governu ne’e inkompletu, ida ne’e mak dada impase polítika ne’e to’o agora. Segundu maka lei Orsamentu Jeral estadu 2020 ne’e laiha. Terseiru maka maioria parlamentar husi AMP laiha ona. Agora hetan apoiu husi FRETILIN atu viabiliza Governu, maibe defaktu ninia estrutura iha parlamentu seidauk hatudu katak iha nia maioria parlamentar. Iha problema tolu ne’e mak ita enfrenta.”dehan Amu Júlio.

Jurista ne’e fundamenta, problema fundamental atu VIII Governu labele la’o to’o 2023 ne’e mak enfrenta kestaun barak ne’ebé la priense.

“Enfrenta problema fundamental iha proposta lei OJE 2020. Proposta lei OJE 2020 ne’e, nia mai kedas husi Outubru ne’e nia iha problema ona. VIII Governu e Lei Orsamentu Jestaun Finanseira haruka hatama ate dia 15 de Outubru, maibe VIII Governu ne’e hatama 16 de Outubru, ne’e primeira kestaun jurídika ne’ebé maka VIII Governu ne’e la tuir. Segundu hatama tiha iha 16 ajenda depois to’o iha debate atu ba vota iha jeneralidade VIII Governu retira, ida ne’e mak sai problema sériu ligadu ona ho orsamentu jeral estadu, no problema retira ida ne’e iha problema jurídika e konstitusional ne’ebé sériu. Problema jurídika ne’e dehan katak, kuandu proposta lei ida tama ona iha parlamentu nasional maka la votada, proposta lei ne’e labele hatama fila-fali iha mezma sesaun lejislativa. Se la votada, ne’e (VIII Governu) labele hatama fali iha sesaun lejislativa tuir mai ida komesa 15 de Setembru oin mai mos labele hatama fali. Iha situasaun ida ne’e maka VIII Governu ne’e, nia labele la’o to’o iha 2023 tanba nia labele fali ona hatama orsamentu jeral estadu iha mesma sesaun lejislativa ne’e no iha sesaun lejislativa tuir mai, e artigu ida ne’e iha númeru 5 husu atu wainhira atu bele hatama fali proposta ne’ebé hanesan lei ne’e atu kaduka so liu husi demisaun de Governu, ida ne’e mak problema. Se ita la demite VIII Governu, ita laiha orsamentu jeral Estadu”,dehan jurista Amu Júlio Crispim, ba GMN iha Bebora Díli, Segunda (11/5/2020).

Kona fali ba atu halo ajendamentu ba karta destituisaun ba Prezidente Parlamentu Nasional, Jurista Júlio Crispim, lia tun tan katak, ida ne’e Prezidente Parlamentu Nasional mak iha poder tomak atu halo ajendamentu, la’os Vise PPN mak haksoit ba lidera meja kuandu laiha delegasaun kompetensia husi PPN.

“Ita-nia Estadu deireitu demokrátiku husu ba orgaun estadu subordina ba lei no konstituisaun,  orgaun soberani hot-hotu. Artigu 2 númeru 2 da konstituisaun. Ida ne’e bolu prinsípiu primariu da lei, ne’ebé ita labele bo’ok. Ajenda ne’e obrigatóriu, maibe molok to’o obrigatóriu iha prosesu lobuk bo’ot ida ne’ebé primeiru rekezitus 10 deputados cumprir, segundu rajaun dívidamente fundamentada e depois lori ba iha líder bankada konferensia lider bankada atu bele haree rekezitus depois kuandu los ona fila mai prezidente atu bele halo ajenda. Kuandu ajenda ona, atu ba lidera meja, prezidente la lidera bele despaixu ba vise sira atu bele lidera dezde que nia falta ou iha impedimentu. Maibe importante mak ita koalia destituisaun ne’e saida? Ita labele koalia nar-naran de’it! Destituisaun ne’e akontese bainhira titular ida ne’e prátika krime e hetan ona ninia pena efektiva mak nia ba kumpri iha prijaun, ne’e mak foin halo destituisaun. Ne’e rajaun ne’ebé mak iha rejimentu artigu 16 númeru B dehan rajaun devidamente fundamentada ne’e mak ida ne’e, kuandu prezidente parlamentu nasinal halo krime e Tribunal kondena nia katak, nia tenke kumpri efektivamente iha tribunal. Ida ne’e mak foin bele iha destituisaun, ida ne’e mak rajaun dívidamente fundamentada, e ita bo’ot sira bele ba konsulta iha literatura jurídika iha mundu tomak katak wainhira iha destituisaun ne’e kuandu titular de orgaun soberania, nia enfrenta prosesu kriminal ida, prosesu kriminal ne’e lori nia ba iha julgamentu e julgamentu ne’e kondena katak, nia iha pena prijaun efektiva ne’e mak foin kumpri.”dehan jurista Amu Júlio Crispim.

Kona ba kuandu Vise PPN ba lidera de’it meja hodi ajenda karta destituisaun ne’ebé hatama husi proponente sira bele ka lae? Jurista Amu Júlio Crispim, subliña,  “Atu halo ajenda destituisaun ne’e tenke verifika lai rekezitu sira ne’e lai ka. Razaun devidamente fundamentada ne’e iha ka lae? Se iha entaun foin bele lori ba e halo ajenda! La’os de’it rajaun polítika sira ne’ebé maka ka rajaun administrativa sira ne’ebé mak iha, ida ne’e lae”.GMN


Banner

Foto

Notisia Ikus

FRETILIN: Ema balu tenta destrói amizade Taur-Alkatiri iha MedSos

September 23, 2021
Xefe bankada FRETILIN, Francisco Miranda Branco,...

Governu propoin PR Lú Olo renova EE

September 23, 2021
Governu kontinua propoin, ba Prezidente Repúbli...

Governu hakotu SS iha munisípiu tolu, Díli mantein

September 23, 2021
Governu iha reuniaun Konsellu Ministru (KM), Kua...

Governu preparadu antesipa La Niña

September 22, 2021
Sekretariu Estadu Protesaun Sivíl (SEPS), hala...

FP mate, naran nafatin iha lista liña frente, KFP tenke investiga

September 22, 2021
Parlamentu Nasionál (PN), liu hosi bankada CNRT...
1 2 3 643

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker