GMN TV Politika Konsidera asaltu poder, PPN sei keixa VPPN Angelina ba Tribunal

Konsidera asaltu poder, PPN sei keixa VPPN Angelina ba Tribunal

0 views

Prezidente Parlamentu Nasionál (PPN), Arão Noe Amaral, hatete, Vise Prezidente PN, Maria Angelina Sarmento halo asaltu de poder, tanba obriga prezide plenária, maske la hetan autorizasaun hosi PPN rasik. Tanba ne’e, nia parte sei keixa hahalok asaltu de poder ne’e ba Tribunal.

Tuir Arão Noe, vise viola konstituisaun ho rejimentu kona-bá kompetensia prezide reuniaun líder bankada no prezide plenária iha Parlamentu Nasionál.

“Iha loron 13 Maiu 2020 Bankada Fretilin, PLP, no KHUNTO dirije Rekerimentu Distituisaun Prezidente Parlamentu Nasional ba fali Vise Prezidente Parlamentu Nasional. Aktu ida ne’e Viola KRDTL Artigu 99 (3), Rejimentu Parlamentu Nasional Artigu 17 kona-ba Kompetensia Prezidente Parlamentu Nasional. Konstituisaun Artigu 99 (3) hateten momoos katak Parlamentu Nasional Reuni Ordinariamente tuir Konvokasaun Prezidente Parlamentu nian. Tanba ne’e Vise Prezidente Parlamentu Maria Angelina Lopes Sarmento nia aktu sira ne’e viola KRDTL, LOFAP, Kodigu Penal, no Rejimentu Parlamentu Nasional. Vise PPN Maria Angelina Lopes Sarmento Obriga Xefe Divizaun Apoiu Plenária ka DIPLEN, Sr. Quintiliano Ase atu ajenda no prepara material ba plenária iha loron 18 Maiu 2020. Aktu ida ne’e viola Rejimentu Parlamentu Nasional Artigu 22 kona-ba kompetensia Vise Prezidente Parlamentu Nasional nian. Vise Prezidente Parlamentu Nasional so bele ezerse PPN nia funsaun bainhira hetan delegasaun kompetensia husi PPN tuir Rejimentu Artigu 22 nu. 3.

Tuir prosedimentu normal iha Parlamentu Nasional, Prezidente Parlamentu maka iha kompetensia atu konvoka Konferensia Lideres Bankada hodi aprova ajenda ba plenária.

Bainhira Lideres Bankada sira aprova ona ajenda maka Prezidente halo despaixu ba DIPLEN prepara ajenda ba plenária, se laiha reuniaun líder bankada maka plenária mos laiha.

Xefe DIPLEN konsidera katak prosesu ne’ebe Vise Prezidente Parlamentu Nasional Maria Angelina Sarmento halo ne’e kontra aktu normal funsionamentu Parlamentu Nasional, nune’e devolve fila fali despaixu refere ba Gabinete Vise Prezidente nian.

Tanba la konsege Obriga DIPLEN, Vise Prezidente Parlamentu Maria Angelina Lopes Sarmento halo despaixu ba Sekretariu Jeral atu ajenda Plenaria ba loron 18 Maiu 2020.

Sekretariu Jeral Parlamentu Nasional Divolve Despaixu husi Vise Prezidente Parlamentu Nasional tanba Konsidera despaixu refere Kontra LOFAP Artigu 7. LOFAP Artigu 7 hateten katak tenke iha delegasaun kompetensia husi Prezidente ba Vise Prezidente Parlamentu por eskrita antes Vise Prezidente bele toma funsaun Prezidente Parlamentu nian.

Aktu sira ne’e konsidera nudar hahalok hadau poder ne’ebe kontra Konstituisaun da Republika, Kodigu Penal, Rejimentu Parlamentu Nasional no Lei Organizasaun Funsionamentu Administrasaun Parlamentar.

Prezidente Parlamentu REAFIRMA katak Bazeia ba KRDTL Artigu 86 (f), Parlamentu Nasional hein DISOLUSAUN husi Prezidente da Republika. Prezidente Parlamentu Firme hodi defende KRDTL tuir Artigu 2 (2) katak Estadu Hakruuk ba Konstituisaun no Lei Oan sira. Prezidente Parlamentu husu ba ITA HOTU atu Hakruuk no Kumpre KRDTL.”tenik PPN Arão Noe liu hosi konferénsia ba imprensa iha PN, Segunda (18/05/2020).

Arão subliña, dalan legal iha atu prosesa, bainhira kontinua obriga, nune’e, nia parte sei la responsabiliza, bainhira laiha autorizasaun.

“ Ita estadu de direitu, estadu ida ne’ebé regula tuir regras konstitusionais, iha dalan sira ne’e mak ita bele no asaun saída de’it,”tenik Arão Noe.

Ho nune’e, vise Prezidente PN, Maria Angelina rekoñese, ajenda ba plenária ne’e, la prepara liu hosi reuniaun líder bankada, tanba ne’e mak nia parte prefere diskute no aprova iha plenária nu’udar órgaun kolezial.

Nune’e nia parte mós konsidera PPN rasik viola rejimentu, tanba rekerimentu to’o loron lima liu mós la ajenda ba plenária.

 “PPN iha direitu tomak tuir konstituisaun artigu 150 ne’ebé PPN mós bele hato’o keixa ba Tribunal, bainhira nia sente ofendidu ka sente prejudikadu hosi desizaun ne’ebé plenária delibera, PPN iha direitu tomak, ”esklarese Angelina.

Entretantu, rekerimentu destituisaun ne’e, bankada PLP,Khunto ho Fretilin aprezenta dahuluk iha loron 5 fulan Maiu ne’e, ne’ebé diriji ba Prezidente Parlamentu rasik, maibé xefi órgaun lejisladór ne’e rezeita ajenda, tanba konsidera laiha razaun fundamental, nune’e bankada tolu haruka karta desituisaun daruak nian, maibé kontinua la ajenda.

Tanba ne’e, bankada tolu desidi prezide karta destituisaun ne’e, ba fali vise prezidente, Maria Angelina, atu diriji plenária, hodi halo aprovasaun ba rekerimentu destituisaun Prezidente Parlamentu, maibé iha Segunda feira ne’e, plenária labele realiza, tanba hetan tiha impedimentu hosi deputadu sira bankada CNRT.Say


Banner

Foto

Notisia Ikus

Governu sei dezenvolve Sentru Agríkola Quinta Shalom Farm Hera

September 20, 2021
Primeiru Ministru (PM), Taur Matan Ruak, hatete,...

PN haree Governu book-an “maten liu” antisipa dezastre naturais

September 20, 2021
Parlamentu Nasionál (PN) haree Governu book-an ...

Vizita izolamentu Lahane, PM Taur rekomenda pontu importante tolu

September 20, 2021
Primeiru Ministru (PM), Taur Matan Ruak, hala’...

Konta deit istória, sai dezafiu ba konstrusaun Estadu

September 19, 2021
Sekretáriu Jerál Partidu Uniaun Demokrata Timo...

CNRT seidauk iha kandidatu ba PR

September 19, 2021
Komisaun Polítika Nasionál (KPN) Partidu CNRT,...
1 2 3 641

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker