Vise Prezidente Konsellu Veteranu Libertasaun Nasional (KVLN), Marito Reis, hateten, Konsellu Veteranu Libertasaun Nasional husu órgaun soberanu sira atu hala’o kna’ar tuir Konstituisaun RDTL.
Konsellu Veteranu Libertasaun Nasional hato’o Preokupasaun ne’e relasiona ho impase polítiku ne’ebé kontinua la’o iha rai laran hodi halo povu kiik sira sai vítima ba ego polítika ukun-na’in sira nian.
“Konsellu Veteranu Libertasaun Nasional sira-nia haree duarante ne’e Timor - Leste hasoru problema krize polítiku no pandemia COVID-19 hodi fo impaktu maka’as ba povu nia moris, tanba povu araska tebes atu hetan osan atu sosa ai-han ruma hodi sustenta sira-nia família moris lor-loron nian”,hateten Veteranu Marito Reis ba GMN iha Kaikoli, Díli, Kuarta (13/05).
Marito Reis mos fó apresiasaun ba povu Timor-Leste tomak tanba ho situasaun polítika no pandemia COVID-19 ne’ebé iha, povu nafatin hakmatek no unidade hodi hametin paz no estabilidade iha Timor-Leste.
“Ami fó apresiasaun ba povu Timor-Leste tomak tanba ho situasaun polítika no pandemia COVID-19 ne’ebé iha, povu nafatin hakmatek no unidade no mós apela ba povu tomak atu mantein no hametin liutan matoridade polítika ne’e kaer metin prinsípiu no valores unidade nasional hodi la monu ba manobra no rumores ne’ebé bele hamosu dezintregasaun ne’ebé hafahe lorosae ho loro monu. Konsellu Veteranu Libertasaun Nasional mós husu ba instituisaun seguransa sira atu kontinua servisu ho neutru hodi garantia pas no estabilidade ba povu Timor-Leste.”tenik tan.
Husu povu hakmatek
Nune’e mos Prezidente Konsellu Veteranu Libertasaun Nasional, Vidal de Jesus Riak Leman, husu ba povu atu hakmatek iha ida-idak nia fatin hodi fó tempu ba ukun na’in sira rezolve impase polítiku iha rai-laran.
“Ita hotu preokupa ba impase polítiku ne’ebé dura kuaze tinan tolu ona iha rai-laran hodi fó impaktu ba povu nia moris no impede mós prosesu dezenvolvimentu nasional, tanba ne’e iha tempu besik Konsellu Veteranu Libertasaun Nasional sei organiza malu hodi hasoru malu ho líder polítiku sira atu ko’alia kona ba oinsa bele hakotu impase polítiku ne’e hodi halo dezenvolvimentu iha teritóriu Timor laran tomak atu hasai povu husi kiak no mukit”,hateten Riak Leman ba GMN iha Kaikoli, Díli, Kuarta (13/05).
Riak Leman mós husu ba povu atu tur hakmatek iha uma husik líder sira mak rezolve situasaun impase ne’e no mos husu ba líder nasional sira atu halo diálogu hodi buka solusaun.
“Ha’u husu ba maun Xanana, maun Ramos Horta, maun Mari Alkatiri, maun Taur Matan Ruak, Maun Lú Olo, no Maun Lere, atu tur hamutuk halo diálogu hodi buka solusaun tanba povu lakohi terus bebeik ona, alende ne’e husu mos ba Juventude no veteranu sira atu tur hakmatek hodi akompaña situasaun ne’e atu fó tempu ba líder polítiku sira buka solusaun.”Riak Leman.aba
