Primeiru Ministru (PM), Taur Matan Ruak, ho jestu hamnasa hatete, prontu servisu hamutuk ho Prezidente Repúblika (PR), eleitu, José Manuel Ramos Horta, hodi hala’o dezenvolvimentu ida di’ak liu ba povu no nasaun.
Xefe Governu hato’o deklarasaun, hafoin enkontru ikus ho Prezidente Repúblika, Francisco Guterres Lú Olo hodi informa kona-bá preparasaun serimónia investidura ba Prezidente Repúblika (PR), ne’ebé sei realiza iha loron 19, fulan-maiu ne’e, no komemorasaun tinan XX, Restaurasaun Independénsia.
“Prontu 300%, prontu 300 %,” dehan Taur Matan Ruak, bainhira hala’o enkontru ikus ho Prezidente Repúblika, Francisco Guterres Lú Olo, iha Palásiu Prezidensiál Bairo-Pité, Díli, Kuarta (18/05).
Kona-bá Xefe Governu nia omólogu sira ne’ebé konfirmadu atu partisipa iha serimónia investidura ba Xefe Estadu eleitu no komemorasaun tinan 20, Restaurasaun Independénsia mak Xefe Governu Guinea-Bissau, Governadór Jerál Austrália, no Prezidente Repúblika Portugal.
PM Taur mós apela ba sidadaun hotu nafatin kria páz no estabilidade iha ámbitu investidura ba PR eleitu Ramos Horta no komemorasaun tinan XX Restaurasaun Independénsia.
“Espera katak páz i estabilidade iha ita-nia nasaun, konkista iha tempu tinan 20 nia laran bele metin liu tan, por outru loron importante tomada pose ba Prezidente eleitu transferénsia responsabilidade festa bo’ot ba ita nia rain ida ne’e” apela Taur.Ben
