Konsellu Ministru (KM) extra-ordinária Segunda (16/05), aprova Projetu Dekretu-Lei kona-bá alterasaun Dekretu-Lei númeru 14/2018/ hodi inklui Sekretaria Estadu foun iha kompozisaun VIII Governu. Sekretaria Estadu foun ne’e mak “Sekretariu Estadu Komunidade Timor-Oan iha Estranjeiru”.
Governu konsidera, Sekretáriu Estadu foun ne’e importante, no nesesáriu tebes atu asegura no hametin lasu komunidade Timor-oan sira iha diáspora.
No atu asegura mekanismu ne’ebé efetivu liu, atu envolve Timor-oan hirak ne’ebé hela, no servisu iha rai-liur ba prosesu dezenvolvimentu nasaun nian.
“Sekretáriu Estadu foun ninia kna’ar prinsipal mak halo akompañamentu ba komunidade Timor-oan sira iha diáspora, Timor-oan sira iha Reinu Unidu, iha Países Europeius sira, iha Australia, Indonézia no iha fatin sira seluk, ne’e presija akompañamentu ne’ebé besik, liuhosi Governu, nune’e sira ne’ebé hela iha diáspora la sente mesak,” dehan Ministru Prezidénsia Konsellu Ministru, Fidelis Manuel Leite Magalhães, iha Díli, Segunda (16/05).
Governu mós prevé ona orsamentu rihun USD 500 husi Orsamentu Retifikativu ba Sekretária Estadu Komunidade Timor-Oan iha Rai-Liur ne’e.Ags
