GMN TV Economia Horta hakarak ekonomia rai-laran la’o ba oin

Horta hakarak ekonomia rai-laran la’o ba oin

266 views

Prezidente Repúblika (PR), José Manuel Ramos Horta, hakarak kreximentu ekonomia rai-laran la’o di’ak, durante tinan lima ba oin, nune’e bele lori povu sai husi situasaun probreza nia laran.

Ramos Horta hato’o asuntu ne’e, hafoin halo abertura ba Konferénsia Internasionál ne’ebé organiza husi Universidade Nasionál Timor-Lorosa’e (UNTL) ho organizasaun g7+, ho tema “Timor-Leste: Two Decades of Peacebuilding and State Building Challenges and Opportunities” iha salaun auditóriu UNTL, Hera, Segunda (23/05).

“Oportunidade ba oin, bele haree oinsá tinan lima mai ne’e rai ne’e nia ekonomia haksoit ba oin, ha’u lakohi haree polítika oi-oin, ha’u hakarak haree deit oinsá ekonomia haksoit ba oin, investidór mai para ki’ak sira nia moris di’ak liu, para kosok-oan moris di’ak liu, edukasaun la’o di’ak,”dehan PR Ramos Horta, hodi kontinua dehan lakohi haree polítiku sira halo diskursu oi-oin, maibe rezultadu laiha.

Xefe Estadu ne’e observa katak, TL ukun-an tinan 20 ona, no susesu ne’ebé nasaun ne’e hetan mak “Rekonsiliasaun Nasionál”, maibé kona-bá dezenvolvimentu setór infraestrutura no ba moris di’ak povu nian, seidauk atinje meta ne’ebé hatúr ona iha Planu Estratéjiku Dezenvolvimentu Nasionál (PEDN) 2011-2030.

“Susesu bo’ot iha Independénsia to’o agora 20 anos mak ida ne’e, ‘rekonsiliasaun’, laiha buat ida importante liu duke ida ne’e, rekonsiliasaun nasionál, rekonsiliasaun Indonézia se laiha karik rekonsiliasaun nasionál ne’ebé maun-bo’ot Xanana mak inspira mak dada” katak Ramos Horta.

Horta fó hanoin katak, tempu ona haluha odiu no vingansa sira ne’ebé iha durante funu ba libertasaun pátria, no husu sidadaun hotu respeita nafatin erói no mártir sira ne’ebé mate ba libertasaun pátria.

“Simu malu, haluha tiha buat a’at ba kotuk, la haluha ita-nia martir la haluha ita-nia erói sira, mas labele husik buat a’at sira mak domina fali prezente iha futuru” tenik Xefe Estadu.

Sekretáriu Jerál g7+, Helder da Costa dehan, Konferénsia Internasionál ne’e importante, nune’e tempu ona atu halo balansu no halo reflesaun ba dezafiu ne’ebé nasaun ne’e infrenta durante tinan 20.

“Halo reflesaun, halo balansu kona-bá trezitoria dezenvolvimentu Timor-Leste nian durante 20 anos lisaun saida maka ita aprende, saida mak ita halo saida mak ita bele aplika iha futuru próximu mai” dehan Helder da Costa.

Reitór UNTL, João Soares Martins hatete, konstrusaun Estadu durante tinan 20 presiza haree fali dezafiu ne’ebé infrenta iha pasadu.

“g7+ ho UNTL organiza hamutuk konferénsia ida ne’e atu haree oinsá ita-nia konstrusaun da paz, konstrusaun da Estadu nasaun la’o durante 20 anos nia laran í haree dezafiu saida mak ita atravesa oportunidade saida mak sei mai para bele halo Konstituisaun di’ak liu tan” hakotu João Soares Martins.

Antes ne’e, Banku Mundial iha Timor-Leste (BM-TL) fó sai katak, ekonomia iha nasaun ne’e la’o hakdasak, la’ós tanba kauza husi COVID-19, maibé tanba polítika nasaun ne’e nian mak la estavel.

Diretór Ezekutivu BM-TL, Bernard Harborne, dehan, situasaun ne’e hanesan lisaun ida ba Governu atu investe maka’as iha setór produtivu, hanesan agrikultura, turismu, edukasaun, saúde no setór hirak seluk ne’ebé kontribui retornu ba Estadu. Tanba TL depende bebeik ba fundu petrolíferu ekonomia sei frazil liu tan iha futuru.

“Atu Governu foku ba iha área sira ne’ebé bele ajuda kreximentu ekonómika, hanesan ohin ita dehan ba dezenvolvimentu kapitál humanu liuhusi edukasaun no saúde, tanba ita hatene katak, nasaun nia futuru iha ninia ema sira no ba iha área naun petrolíferu ita bele investe iha setór agrikultura, tanba ita hatene katak 70% husi Timor-oan rasik tama kategoria ho agrikultura ho setór ida ne’e importante tebes bele ajuda nasaun nia ekonomia” sujere, Bernard Harborne ba GMN iha nia edifísiu Surik-Mas, Kinta (16/12/2021).

Nune’e mós ekonomista Timor-oan, Atuál Reitór UNPAZ, Adolmando Amaral hatete, TL nia ekonomia ameasu boot iha sudueste asiátiku, tanba Produtu Internu Brutu (PIB) tun-ba negativu 8, la’os impaktu husi pandemia COVID-19, maibé tanba produsaun rai-laran ki’ik, depende liu ba produtu importadu, nune’e laiha liu balansu exportasaun no importasaun.Ben


Banner

Foto

Notisia Ikus

PN pede às autoridades sanitárias que inspecionam carne vendida nas bermas das estradas

July 1, 2022
O deputado da bancada da Frente Revolucionário ...

Inflasaun Global halo TL lakon retornu investimentu FP biliaun USD 1.6

July 1, 2022
Ministru Finansan, Rui Agusto Gomes hateten, dur...

Xanana husu nasaun hotu atu proteje Oceano ho baze iha siénsia no inovasaun

June 30, 2022
Líder Nasionál Kay Rala Xanana Gusmão, husu b...

SEFOPE sei hamenus númeru dezempregu iha rai-laran

June 29, 2022
Sekretaria Estadu Formasaun Profísional no Empr...

AJAR apresia TR deside Projetu-Lei Responsabilidade PR inkonstitusionál

June 29, 2022
Diretór ezekutivu Asia Justice And Right (AJAR)...
1 2 3 742

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker