GMN TV Economia OJE 2022 sa’e to’o billiaun USD 3.1 ameasa ba Fundu Minarai

OJE 2022 sa’e to’o billiaun USD 3.1 ameasa ba Fundu Minarai

317 views

Orsamentu Jerál Estadu (OJE) 2022 ne’ebé Parlamentu Nasionál aprova iha fulan-dezembru 2021 no Prezidente Repúblika promulga iha janeiru 2022 motante billiaun USD 2.1 ( USD 2.178.328.791.).

Husi total OJE promulgadu ne’e, PN autoriza Governu hodi halo levantamentu husi Fundu Minarai ho montante billiaun USD 1.3 (USD 1.311.387.267), no Rendimentu Sustentavel Estimadu (RSE) ba OJE 2022 mak millaun USD 637,656.024.

Ho motante ne’ebé iha, ba trimestre dahuluk (janeiru-abril 2022),  Governu foin ezekuta deit 8%, maibé Konsellu Ministru iha Kuarta (27/04)  reuniaun extraordinariu halo alterasaun ba Lei OJE 2022 nian hodi prevé tan Orsamentu Retifikativu (OR) billiaun USD 1.229,857,000.

Nune’e totál Orsamentui Jerál Estadu ba tinan fiskal 2022 nian sa’e to’o billiaun USD 3.1. Ho númeru orsamentu ne’ebé iha, sai preokupasaun Sosiedade Sivíl sira, tanba bele ameasa ba sustetabilidade Fundu Petrolíferu ne’ebé nasaun ne’e iha.

“Pedidu Orsamentu Retifikativu ba tinan 2022, ladun iha urjensia no la nesesáriu atu lori ba Parlamentu Nasionál hodi debate no aprova, tanba tuir La’o Hamutuk iha kestaun balun ne’ebé presiza diskute hanesan, Fundu Petrolíferu ne’ebé tempu ba tempu tun ba dadaun,” dehan Koordenadór La’o Hamutuk, Celestino Gusmão, ba GMN, Segunda (02/05) iha Bebora, Díli.

Koordenadór Lao Hamutuk ne’e esplika, Orsamentu Retifikativu ne’ebé Governu prevé ne’e la nesesáriu no urjensia, tanba aloka deit ba pensaun veteranu, subsídiu akomodasaun PNTL no F-FDTL, pagamentu ba diferensa remunerasaun PNTL nian ho rejime salariál foun, no hari’i sede arte marsiál no rituál.

“Karik Governu iha razaun atu halo ida ne’e, maibé ida ne’e la justifika pedidu urjensia ne’ebé sira husu” katak Koordenadór LH ne’e.

Tan ne’e tuir Sosiedade Sivíl nia observasaun durante ne’e, problema ne’ebé ho karakter urjensia ba Governu atu hola lalais medida ruma mak, nesesidade bázika ba populasaun, subsídiu ba agrikultór sira, la’os apoiu fali ba veteranu no saláriu servidór Estadu nian.

Nia dehan, kona-bá bolsu estudu no internet gratuita ba estudante sira ne’e importante, tuir lolos iha tinan barak Governu halo ona, maibé iha situasaun COVID no krize mundiál mak Governu foin implementa polítika ne’e.

“Ai-han báziku ba populasaun, tanba espozisaun hosi Orsamentu Retifikativu bazeia ba asuntu rua, ida kona-bá pandemia COVID-19 no ida seluk mak sasán folin sa’e kauza hosi funu entre Ukránia no Rúsia, nune’e Governu uza razaun rua ne’e atu aplika medida sira ne’ebé inklui Orsamentu Retifikativu” kestiona Celestino.

Relatóriu Banku Mundiál no Projesaun Ministériu Finansas

Rekorda katak, Banku Mundiál iha Timor-Leste (BM-TL), lansa Relatóriu Revizaun Despeza Públika 2021, rekomenda ba Governu atu halo mudansa ba gastu despeza públiku ho di’ak.

Tanba tuir Banku Mundiál, iha dékade ikus ne’e, Timor-Leste nia kreximentu ekonomia la’o neneik, no despeza públika a’as liu iha mundu kuaze 90%.

“Timor-Leste susesu tebes iha nia kriasaun ba fundu riku-soin husi rezerva mina-rai no gás sira, maibé ami-nia revizaun hatudu katak, ho padraun despeza hanesan dadaun ne’e, fundu petrolíferu bele hotu ida dékade ne’e nia rohan” hatete Bernard Harborne, hafoin lansa relatóriu Timor-Leste Public Expenditure Review 2021 (TL-PER) nian, iha Aitarak-Laran, Tersa (09/11/2021).

“Timor-Leste faces the risks of a fiscal cliff as, under the current spending trajectories, the Petroleum Fund may be fully exhausted in about ten years”, esplika iha relatóriu ne’ebé GMN asesa.

Nune’e mós, tuir projesaun ne’ebé Ministériu Finansas (MF) fó sai iha portál Gabinete Ministériu Finansas katak, Fundu Minarai (FM) sei remata iha tinan haat antes, duke iha tetu orijinál billiaun USD 1.675 ho presupostu despeza per kapitál real hanesan nafatin.

Bainhira projeta kreximentu orsamentu iha futuru ba iha taxa kreximentu tuir kategoria dotasaun istóriku FM sei remata iha tinan rua antes.

“Ida-ne’e signifika katak, Fundu Minarai sei totalmente remata iha tinan 2033, tinan 11 deit ona husi tinan 2022,” sita iha informasaun ne’ebé publika iha portál Gabinete MF, Kinta (16/12/2021).

Depois tinan 2033, OJE Timor-Leste sei hetan finansiamentu husi reseita doméstika ne’ebé daudaun ne’e kuaze porsentu 12 de’it husi kustu sira-ne’ebé mak daudaun ne’e la-kobre sálariu no vensimentu.

Relatóriu Trimestrál Fundu Minarai ba tinan 2021

Banku Sentrál Timor-Leste (BCTL-sígla Portugés) lansa relatóriu trimestrál Fundu Minarai Timor-Leste nian ba trimestre ne’ebé termina iha loron 31 fulan-desembru, tinan 2021.

Relatoriu ne’e hatudu katak, Kapitál Fundu nian iha trimestre ikus ne’e mak billiaun USD 19.65 kompara ho billiaun USD 19.17 iha fim trimestre dahuluk.

Relatóriu ne’e mós hatudu katak totál reseitas mak simu iha trimestre ne’e hamutuk millaun USD 467.10 ne’ebé kompostu husi kontribuisaun kontribuinte sira ba Fundu hamutuk millaun USD 284.17 no pagamentu royalty simu husi Autoridade Nasionál Petróleu (ANP) mak millaun USD 180.43 no anual pipe line fee mak millaun USD 2.50.

Rendimentu husi investimentu Fundu nian ne’e hamutuk millaun USD 357.70 kompostu husi kupaun no dividendu ne’ebé simu mak millaun USD 57.72, mudansa iha valór merkadu nian millaun USD 303.46 no movimentu cambiais mak millaun USD 0.56 iha trimestre ne’e.

Ne’e rezulta rendimentu ba karteira Fundu nian durante trimestre ne’e 1,88% enkuantu rendimentu sasukat (benchmark) nian ba periodu ne’e mak 1,91%. */Fel


Banner

Foto

Notisia Ikus

PN pede às autoridades sanitárias que inspecionam carne vendida nas bermas das estradas

July 1, 2022
O deputado da bancada da Frente Revolucionário ...

Inflasaun Global halo TL lakon retornu investimentu FP biliaun USD 1.6

July 1, 2022
Ministru Finansan, Rui Agusto Gomes hateten, dur...

Xanana husu nasaun hotu atu proteje Oceano ho baze iha siénsia no inovasaun

June 30, 2022
Líder Nasionál Kay Rala Xanana Gusmão, husu b...

SEFOPE sei hamenus númeru dezempregu iha rai-laran

June 29, 2022
Sekretaria Estadu Formasaun Profísional no Empr...

AJAR apresia TR deside Projetu-Lei Responsabilidade PR inkonstitusionál

June 29, 2022
Diretór ezekutivu Asia Justice And Right (AJAR)...
1 2 3 742

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker