Prezidente Repúblika (PR) Francisco Guterres Lú Olo, kondekora veteranu kombatente libertasaun nasional 83 ho títulu Colar Ordem Timor-Leste, Póstumu no Medalla Ordem Timor-Leste.
Veteranu kombatente ne’ebé hetan kondekorasaun Colar Ordem Timor-Leste, Colar Ordem Timor-Leste títulu póstumu na’in 4, Colár Orden Timor-Leste na’in 4, Medalla Orden Timor-Leste ho títulu póstumu na’in 13 no Medalla Ordem Timor-Leste na’in 62.
Husi kondekoradu na’in 83 ne’e, kompostu husi sobrevivente 66 no na’in 17 mak husik ona mundu.
Prezidente Repúblika Francisco Guterres Lú Olo hatete, kondekorasaun ba veteranu no kombatente sira ne’e, nu’udar rekoñesementu Estadu nian ba sira-nia luta ba libertasaun patria.
“Ho onra no orgullu boot mak ha’u kondekora ba dala ikus liu, ho naran Estadu Timor-Leste, veteranus luta libertasaun nasional, ne’ebé reziste entre tinan 15 no tinan 19 liuhosi dalan oi-oin no ho ida-idak nia kbi’it rasik, hodi tanen ita-nia mehi boot atu afirma-an iha mundu nu’udar Nasaun no Povu ida ho identidade rasik,” dehan Lú Olo, iha Palásiu Prezidensiál, Bairo-Pité Díli, Segunda (16/05).
Kondekorasaun ne’e, Kombatente Libertasaun Nasionál Luta Armada, Frente Interna, rejistadu no validadu ne’ebé tuir Lei klasifika nu’udar veteranu, nune’e simu hotu ona rekoñesimentu no valorizasaun husi Estadu Timor-Leste.
Alénde fó rekoñesimentu ba veteranu no saudozu sira, Estadu mós fó protesaun ba veteranu sira-nia oan, no faluk.
“Maibé Estadu fó mós protesaun ba sira-nia dependente sira, oan kiak no faluk sira” tenik PR Lú Olo.
Xefe Estadu mós apela ba kombatente no família mártir sira atu kaer metin nafatin prinsípiu no valór sira ne’ebé eroi sira seluk kuda hela ba povu no nasaun.
“Ha’u hakarak apela dala ita tan ba kombatente ida-idak no ba sidadaun hot-hotu atu kaer metin nafatin onra no orgullu pertense ba Povu ida de’it no ba Rai ida de’it: Timor-Leste! Ba segunda faze libertasaun nasionál, halakon kiak no hatúr justisa sosiál, ita presiza tanen nafatin sentidu pertensa ida ne’e” hakotu.
Kondekorasaun ne’e bazeia ba Dekretu Prezidente Repúblika númeru 25/2022, loron 14 fulan-maiu, atu kondekora sidadaun nasionál sira iha ámbitu komemorasaun tinan 20 Restaurasaun Independénsia.
Tuir Dekretu-Lei númeru 20/2009, kondekorasaun ne’e atu rekuñese ema estranjeiru no sidadaun Timor ne’ebé fó ona kontribuisaun boot ba libertasaun patria.Ade
