Prezidente Konsellu Nasional Edukasaun Katólika (KONEK), Padre Mateus Afonso, hatete, problema edukasaun iha eskola Katólika sira iha rai-laran mak, profesór barak liu mai husi Funsionáriu Públiku (FP), tanba ne’e iha profesór balun la dun foku atu hanorin estudante sira.
Prezidente Konsellu Nasional Edukasaun Katólika (KONEK), Padre Mateus Afonso. FOTO:GMN
Padre Mateus Afonso hato’o asuntu ne’e, ba jornalista sira, Kuarta (4/5/2022), hafoin hasoru malu ho Prezidente Repúblika eleitu, José Ramos Horta, iha Farol, Díli, hodi koalia kona-bá dezenvolvimentu edukasaun iha Timor-Leste.
Durante enkontru ho Xefe Estadu eleitu, saserdote ne’e afirma, koalia liu kona-bá hadi’ak no dezenvolve liu tan kualidade edukasaun iha Timor-Leste, iha nível Pré-Eskolar to’o Ensinu Sekundáriu no mós Ensinu Superiór Fundasaun Dioseze Maliana no Fundasaun Baucau.
“Problema edukasaun mak ne’e, eskola Katólika ninia profesór sira barak liu mai husi funsionáriu, entaun problema iha osan, ema sira hanorin iha eskola Katólika ne’e halo konforme, la’os jerál. Sira dehan, ami, Estadu mak selu, la’ós Igreja mak selu, ami hanorin konforme buat ne’ebé mak ami bele halo,” dehan Padre Mateus Afonso.
Prezidente KONEK akresenta, profesór sira ne’ebé hanorin iha eskola Katólika, selu husi Governu, tanba eskola Katólika laiha kbiit atu selu.
Hatán ba kestaun ne’e, PR eleitu José Ramos Horta, hatete, tuir lei orgánika Prezidente Repúblika sei iha departamentu ida liga ho edukasaun, kultura, sosiál, justisa no direitu umanu atu haree mós asuntu ne’e.
“Sei haree lai, mas klaru sim, sei iha departementu ida que liga ho edukasaun, kultura, kestaun sosiál, justisa, direitu umanu, la’ós atu hadau Governu nia kompeténsia mas hanesan responsabilidade ita hotu-hotu nian” tenin PR eleitu Horta.GMN
