Prezidente Repúblika (PR) eleitu, José Ramos Horta, informa, Amu Papa Francisco simu ona informasaun kona-bá desizaun Parlamentu Nasionál (PN) Timor-Leste (TL) nian, ne’ebé aprova rezolusaun ida hodi adopta Deklarasaun Fraternidade Umana (DFU) ne’ebé asina husi Amu Papa ho líder bo’ot musulmanu nian.
Ramos Horta hatete, nia parte sei kontinua servisu ho Governu, oinsá atu kontinua iha faze implementasaun deklarasaun refere iha nível nasionál, hodi sidadaun hotu bele asesa no implementa.
“Ida hanesan tradisaun ona, membru Governu ho órgaun soberanu sira hala’o misa agradesimentu ba maromak, atu maromak haraik bensaun ba ita no povu tomak, rona mós Amu Papa nia mensajen, Amu Papa mós simu ona informasaun, kontente ho desizaun Parlamentu nian atu adopta no apoiu ba Deklarasaun Fraternidade Umana, inklui ha’u rasik mós sei kontinua follow-up ba Governu, para haree oinsá atu adopta iha kuríkulu nasionál, ne’e para funsionáriu tomak, jerasaun hotu-hotu bele hakle’an liu tan ita-nia fiar,” kata Ramos Horta, hafoin partisipa misa agradesimentu iha Catedral, Díli, Kuarta (18/05/2022).
Rezolusaun Parlamentu Nasionál kona-bá aseitasaun adopta Deklarasaun Fraternidade Umana ne’e, aprovadu ho votu unanimidade a-favor 60, kontra 0, no abstensaun 0.Say
