Iha ámbitu selebrasaun loron Idul Fitri ba Komunidade Musulmanu, Prezidente Repúblika (PR), Francisco Guterres Lú Olo apela ba sidadaun hotu promove nafatin kultura simu malu, kria paz, amizade no fraternidade iha rai-laran.
Xefe Estadu mós hato’o saúda ba komunidade Musulmanu sira iha Timor-Leste no mós mundu tomak, tuir faze Ramadan ho ritual jejún durante fulan ida, hafoin tama ba Idul Fitri 1443 Hijriah.
“Maluk Musulmanu sira selebra loron ohin ho laran moos tanba fase ona sala, perdua malu ona, halo ona rekonsiliasaun nu’udar família no nu’udar komunidade. Ho selebrasaun ida ne’e, família uma-laran hakle’an nafatin sira nia domin no respeitu ba malu, tanba ne’e importante tebes ba Timor-Leste valoriza loron Idul Fitri”
“Ha’u aproveita loron espesiál ohin atu husu dala ida tan ba sidadã no sidadaun ida-idak, atu fó liman ba malu, nu’udar Timor-oan, no tanen hamutuk prinsípiu no valór sira ne’ebé hametin ita nu’udar povu ida de’it, moris iha uma-lisan boot ida de’it: Timor-Leste!” PR Lú Olo nia mensajen ne’ebé le sai husi Diretór Jerál Prezidensia Repúblika, Domingos Amaral, iha Meskita, Kampung Alor, Díli, Segunda, (02/05).
Lú Olo afirma, mesmu mandatu sei remata iha loron 19, fulan-maiu tinan ne’e, maibé la hakotu misaun nu’udar servidór Estadu no Nasaun, nafatin hamutuk ho sidadaun hotu dezenvolve Timor-Leste ida prosperu iha futuru.
Reprezentante Primeiru Ministru (PM), Filipe da Costa mós husu ba Komunidade Musulmanu sira iha Timor-Leste sai Musulmanu no sidadaun ne’ebé di’ak, kolabaro ho sosiedade tomak luta ba moris di’ak povu nian.
“Sai Musulmanu di’ak, sai sidadaun ne’ebé di’ak no sidadaun di’ak mak hadomi nia-rai reza ba nia-rai nia prosperiedade tulun nia Governu atu implementa programa sira” hato’o Filipe.
Vise Prezidente Konsellu Nasionál Islámika Timor-Leste, (KNIS-TL) Abdulah Inaçio Antonio Soares husu ba Musulmanu sira atu sai sidadaun ne’ebé di’ak, hodi moris tuir doutrina Musulmanu nian, nune’e kontribui ba dezenvolvimentu nasaun.
“Ha’u nu’udar líder Musulmanu ami nia esperansa boot, ami reza nafatin ita-nia rai doben liu-liu ita-nia Governu no ita-nia Estadu iha rai doben ida ne’e espera katak, liuhusi ita-nia doutrina oinsá ita bele estabelese nafatin ita-nia paz, dame no fraternidade” dehan Abdulah Inaçio.
Selebrasaun loron Idul Fitri ne’e, hetan mós apoiu finanseiru husi Governu Timor-Leste, liuhusi Gabinete Apoiu Sosiedade Sivíl, apoiu ho montante USD 500,000.00.Ade
