Prezidente Partidu CNRT, Kay Rala Xanana Gusmão hatete, José Ramos Horta sai Prezidente Repúblika (PR) períodu 2022-2027 ne’e, vitória povu nian, la’ós Horta ninian.
“Ita temi agradesimentu, loos! ekipa susesu atu agradese imi. La’ós ita-nia vitória, la’ós Horta nia vitória, maibé povu nia vitória,” dehan Xanana.
Xefe Estadu eleitu mós, fó parabens ba povu tomak, maske iha difikuldade nia laran, maibé hakat ba sentru votasaun hodi ezerse sira-nia direitu votu. No Xefe Estadu eleitu ne’e promete, sei servisu hamutuk ho Governu atu bele serví dia’k liu tan povu no nasaun ne’e
Horta mós, sei kontinua ho programa sira ne’ebé uluk nia loke ona hanesan internet gratuita, reativa fatin ne’ebé uluk nia loke ba eskola, no fó tempu ba labarik sira atu halimar iha palásiu.
“Parabens ba povu tomak, ba eleitoradu, ba hot-hotu tanba eleisaun ne’e la’o di’ak, partisipasaun aas, maibé iha problema transporte, estrada, problema konfuzaun uitoan kona-bá votasaun”
“Eleisaun di’ak, parabens ba CNE, ba STAE, parabens ba PNTL, no mós ba F-FDTL que tane servisu PNTL nian. Ita agradese observadór internasionál maske situasaun iha mundu difísil no mós CPLP, no observadór nasionál, sosiedade sivíl, konferénsia episkopál, sira hot-hotu ne’ebé mobiliza observadór rihun ba rihun,” agradese Ramos Horta, iha Díli, semana kotuk.
José Manuel Ramos-Horta eleitu ba Prezidente Repúblika períodu 2022-2027 ho votu 398.028 ks 62,1%, hodi halakon kandidatu FRETILIN, Francisco Guterres Lú Olo ho votu 242.239 ka 37,9 %.GMN
