Prezidente Partidu Demokrátiku (PD), Mariano Assanami Sabino, deklara, PD kontinua koopera ho VIII Governu hodi dezenvolve nasaun ba povu nia moris diak.
“Ohin (horiseik-red) ami halo enkontru ho PR ne’e atu kumpri de’it konstituisaun haruka, ne’ebé depois de partido mais votado kuandu aprezenta ona kandidatu ou indijita PM, maka PR tenki bolu partidu sira hotu atu rona sira-nia opiniaun, inklui PD no ha’u hanoin katak importante maka ita hotu hamutuk para konstrói ita-nia rai ne’e diak liu tan no diak ba povu tomak,”Prezidente PD ba jornalista sira hafoin remata enkontru ho Prezidente Repúblika (PR), Francisco Guterres ‘Lú Olo’, iha Palasiu Prezidensial, Bairo Píte, Díli, Tersa (19-06-2018), hodi fahe opiniaun husi lider partidu polítiku no koligasaun partidaria ne’ebé hetan asentu iha Parlamentu Nasional, kona-bá indijitasaun Primeiru Ministru (PM) ba VIII Governu.
Nia akresenta, mezmu partidu polítiku no koligasaun partidaria sira fó opiniaun oi-oin kona-bá indijitasaun PM VIII Governu ba PR, maibé buat ne’ebé importante liu maka hotu-hotu hakarak rai Timor diak liu ba oin no povu moris ho hakmatek no dezenvolvimentu tenki aselera la’o ba oin.
“Ha’u hanoin PR hakarak rona opiniaun husi kada partidu ne’e tanba tuir konstituisaun haruka, ohin (horiseik-red) ami mai fó opiniaun no fó ideia kona-bá saida maka diak liu, maibé importante liu maka ita hakarak hodi ita-nia rai diak liu ba oin no povu hotu-hotu moris ho hakmatek no dezenvolvimentu tenki aselera la’o ba oin,”haktuir Mariano Assanami Sabino.
Nia relata, PD fó ona ninia hanoin ba PR Lú Olo kona-bá PM ba VIII Governu ninian, maibé PD hanoin katak PR mós sei koalia sé maka figura ba ida ne’e, liu husi dekretu PR.
“Ami hakarak kontinua ba oin hodi haree Estadu ida ne’e la’o ba oin no koopera para servisu diak,” hateten Prezidente PD ne’e.
Entretantu tuir Prezidente partidu koligasaun Frente Dezenvolvimentu Demokrátiku (FDD), Antonio de Sá Benevides, hateten, sé de’it maka sai PM ba VIII Governu konstitusional, FDD prontu koopera ho Governu ba prosesu dezenvolvimentu nasaun.
“Em prinsipiu ami laiha obzesaun ba naran ne’ebé iha ba PM VIII Governu ninian no ami laiha kompetensia atu hato’o ba ita boot sira kona-bá naran, tanba ne’e ita tenki hein dekretu PR nian tuun maka ita foin bele hatene, mas em prinsipiu hakarak dehan de’it katak FDD laiha obzesaun, husi parte ami nian prontu koopera ho Governu, Parlamentu Nasional no PR. Ami prontu apoiu Governu signifika sé de’it maka sai PM, ami prontu fó suporta tuir ami ida-idak nia kbiit,”haktuir Antonio Benevides.
Entretantu partidu koligasaun Aliansa Mudansa ba Progresu (AMP) hetan asentu iha parlamentu nasional ho kadeira 34, FRETILIN ho kadeira 23, PD ho kadeira 5 no FDD kadeira 3. Ves
