Lideransa Parlamentu Nasional (PN) V Lejislatura preokupa ho transporte ba deptadu sira, tanba to’o oras ne’e laiha transporte atu fasilita deputadu sira hodi hala’o sira nia kana’ar nu’udar orgaun fiskalizador. Tanba ne’e, PN iha V lejislatura sei fó prioridade atu diskuti oinsa bele sosa kareta foun ba deputadu sira.
Primeiru Vise Prezidenti Parlamentu Nasional, Angelina Sarmento, hateten, deputadu sira presiza fasilidade atu hala’o sira-nia serivisu hodi servi povu.
“Kona ba viaturas ba deputadu sira, ida ne’e mós sai prioridade ajenda ba Parlamentu Nasional, tanba deputadu sira ne’ebé mak hala’o kna’ar iha PN, presiza fasilidade atu bele fasilita sira nia servisu. Bai-bain iha ita nia sosiedade sempre haree ita nia deputadu sira ho kareta marka Prado, maibé ba deputadu sira la’os kareta nia marka, importante mak fasilidade atu bele ajuda deputadu sira nia servisu, tanba sira simu ona posse iha PN, entaun sira hanesan titular husi segundu orgaun Estadu ida ne’e,”relata Maria Angelina Sarmento ba jornalista sira iha PN, Segunda (25/06).
Tanba ne’e, sira presiza fasilidade atu bele hala’o sira-nia kana’ar ho diak atu bele reprezenta povu iha PN.
Hatan kona ba karik iha ona akizisaun ba atu sosa kareta foun, Angelina Sarmento, hateten, ida ne’e kompetensia Konsellu Administrasaun PN nian. “Konsellu Administrasaun mak sei propoin no tau iha ajenda atu bele debate iha tempu badak,” tenik nia.
Angelina dehan, nia seidauk bele ko’alia kona ba atu sosa kareta foun ou la’e, taba ida ne’e kompetensia Konsellu Administrasaun nian.
Maibé Konsellu Administrasaun sei tau prioridade ba kestaun ida ne’e atu bele resolve tiha problema sira ne’ebé deputadu sira laiha transporte atu fasilita sira hal’ao sira nia servisu.
“Ami husi bankada PLP haree katak, la nesesariamente kareta ne’ebé marka koñesidu iha mundu atu bele dignifika deputadu sira, maibé kualker transporte ida atu fasilita deputadu sira,”relata Angelina.cos
